La spusa dil schelau

Glogn 19, p 40ss (Detgas e praulas propi da Medel)

Ina biala matta da Soliva veva in muronz da Bisquolm. Quei era in grond e bi mat ed in capavel catschadur. Els vevan bugen in l’auter e levan gleiti maridar. Ina sereina sera d’atun ch’il da Bisquolm era puspei staus tier sia biala ha el detg avon ch’ir: «Calonda october fagein nus nozzas; lu essan nus um e dunna, entrein en canossa e mo la mort vegn a rumper nies ligiom!» — «E pasch e ventira carschenta deigien habitar en quella, pertgei ti eis mes per ina ed adina e senza tei less jeu pli bugen esser morta che viva.» — Mo cura ch’il prer vi Platta ha clamau ora els per la secunda ga, zacons dis avon las nozzas, e fatg attents ils fideivels: che tgi che sappi impediments dueigi far da saver, ei la mort s’annunziada. Pertgei che l’auter di, cu l’alva cumpara, splunta il catschadur da Bisquolm vid la finiastra da sia spusa, dat il bien di e fa siper ella: «Oz mond’jeu sil Muraun u Pez Medel pil camutsch da nozzas.» E lu ha ella aunc dau ina buna sil frunt a siu spus e quel ei ius — per mai pli turnar! Adumbatten ha ella surcusiu quei di in bi fazalet tgietschen da seida cun steilalvas lien per siu car; adumbatten preparau per ella sezza il pli bi tschupi da nozzas! El ei buca turnaus quella sera, buca gl’auter di; insumma mai pli! Il di che las nozzas duevan esser, ha ella mess en trucca pintga fazalet tgietschen e tschupi alv e bargiu per siu bi e mai emblidau el pli…

Denton ein ils onns i e vegni, en tut varga 60! La muria pintga ei vegnida ella tiara, l’ uiara dils Franzos ed era igl onn dalla fom. Ed aunc adina viveva la spusa dil spariu — e bargeva per siu spus. Mo prendei mira! In bi di d’atun digl onn 1819, ch’il Glatscher da Medel era luaus per spazi da duas casas, han catschadurs anflau ina damaun en Val Plattas agl ur dil glatscher ina bara d’in mat giuven, aunc culla buis enta maun e speras in camutsch tut schelau.

Fatscha, best e membra dil giuven eran aunc aschi frestgs e bials, sco sch’ el fuss spartius pér il mument. In e scadin havess stuiu enconuscber el, mo buc in soli dils presents havess saviu metter a casa il miert. Ins ha purtau la bara oragiu Curaglia e mess ella on pierti-baselgia sin baun. Cheu ein biars i en ed ora, ils da Soliva, Bisquolm e Curaglia, mo negin’ olma che havess enconuschiu el. Geniturs, fargliuns ed enconuschents eran morts e nevs e niazzas tardivs savevan nuot pli d’in aug dispariu, disgraziau.

Il davos, avon che metter en vischi, ei era «la veglia da Soliva» zuppegiada giu Curaglia, per mirar il nunenconuaschent. Ella stuschava encunter ils navonta, era goppa, alva, pintga, rubigliada sc’ina scorsa e mava sin duas canas, anzi ruschnond che sin peis. Tgei surpresa! Ella enconuscha siu spus! Cheu va ina clarezia atras quella cavrida d’ina paupra veglia ed ella croda sper la bara giu. Serevegnida da quella surprida, ch’era franc pli legreivla che tresta, di ella finalmein: «Igl ei miu spus! Jeu sundel varga 60 onns en malencurada per el. 0 buntadeivel Diu che laias aunc ver mei el ina ga avon che murir! Treis dis avon las nozzas eis el daus en ina sfendaglia dil glatscher e mai pli vegnius neunavon!»

Cheu ein tut ils presents vegni cargai da profunda dolur e tristezia ed han spons larmas e larmas, vesend co la buna vegliurda — la spusa da tschei di — fuva danovamein tschaffada dalla flomma da carezia giuvenila. Mo el, aunc giuvens e bials, sco il di avon las nozzas, arveva ni la bucca ni ils egls per dir in per buns plaids alla spusa ch’el veva bandunau — pér stiarsas!

Ella lai purtar el si Soliva en sia stiva, pertgei ella seigi la suletta che hagi il dretg sin el, entochen che la fossa seigi cavada.

Gl’auter di ha l’ entira Val Medel accumpignau alla fossa il spus schelau dalla vegliurda da Soliva. Mo avon che serrar igl uvierchel dil vischi ha ella aviert si la trucca pintga en stiva e priu ora il fazzalet tgietschen surcusius cun steilalvas e mes quel entuorn culiez al car spus. Epi eis’ ella ida suenter bara cun tschupi, sco sch’ ei massen a messa da nozzas. Havend satrau el, eis ella levada si d’ enschanuglias e detg tut dad ault e cun egliada tarlischonta: «In per dis pazienzia, miu car spus, epi vegn era jeu e nus fagein nozzas celestialas…». E per la secunda ga ein ils egls da tut ils Medelins sempleni cun larmas da cumpassiun e commoziun.

Il ranver da Dentervals

Glogn 19, p 40ss (Detgas e praulas propi da Medel)

Dil temps che Dentervals er aunc in’ ucliva, viveva leu in pauper ranver. Buca ch’ el fuss staus gia da naschientscha in tal utschac. Mo carschend a Dentervals ni graun ni terc ed era buca iuas e pomeranzas, vev’ ei num spargnar mintga bluzcher. Cun spargnar e spargnar ei il pauper Toni da Dentervals, che veva pli bia buccas davos meisa che bratscha vid la lavur, daventaus plaun a plaun il pli fin e raffinau ranver ch’ei deva sut las steilas. El tergeva a nez tut e sche pusseivel duas e treis ga la medema caussa.

In schliet onn che Sontgaclau veva sbursau siu davos tgietschen e che S. Martin era vegnius cul sgurdin, veva el aunc giu discletg cullas cauras e nuorsas ch’eran buca vegnidas la mesadad a casa gl’atun dalla scargada. E gest la stad sissu ei sia megliera genetscha crappada dil malner! Il cutsch che veva tratg giu la pial ad ella, ha declarau che quella stoppi vegnir satrada entir ed entratga! Tgi che magli da quella carn seigi dalla mort. Quei seigi vegniu experimentau en tals e semiglionts cass e tgi che vegli buca crer stoppi sentir. Cul cutsch ei staus ord ils egls ha il Toni tartgau: Na, cun da quellas garschira genetschas hai jeu buc el senn da perver ils viarms! Detg e fatg! Denter stgir e clar ha il schani priu dapart la genetscha a bardegliau ella aunc quella sera a casa. Entochen l’ autra damaun da clar ha el giu priu ora las puolpas ed ultra da quei aunc fatg en in’ entira mahoia ligiongias. La combra da carn era aunc mai stada furitgada cun tontas buccadas da nuir, sco quei onn…

Remarcabel denton! Igl unviern era bunamein vargaus ed il Toni veva nuot ughegiau d’ attaccar la combra da carn. In bi di ha el lu tuttina fatg ina emprova. El va sin combra e vegn giun cuschia cun ina mesa rempia secchentada. Quella lai el cuer ditg e liung epi va el on gagliner e dat igl emprem in tec da quella rauba al tgiet vegl da quater onns. Quel seglia sissu sc’in caduscal giuvenaster ed en in gienà ha el lagutiu rubas e strubas e vess aunc magliau ton, sch’el vess survengiu… Encunter sera va Toni on gagliner e mira schebein il vegliander vivi aunc. E prendei mira! El steva cheu a mischun aschi pacific e cuntents, sco’l caplon da Curaglia en siu sessel grond la sera suenter perdanonza da Sontgaclau. L’ autra damaun, igl emprem ch’ei levaus ed ha cantau sco la pli fina sontga schuletga ei stau il tgiet dil Toni!

Ti ridischen co’l Toni selegra! Da miezdi dil medem di ha el priu la curascha e cotg giu il lom ed igl iver dalla genetscha ch’ el veva era secchentau cun gl’ auter epi dau quella pustracca al mas-chel entir, ch’era vegls, buca propi «hezis» e che veva il stumi ualti isau. Ti dieunuardi co il schani ha sgnappau giuaden quella perdanonza! Il Toni steva tut mal d’haver purschiu ina aschi buna buccada a quei lumbardun. E gl’auter di? Tgei smarvegl! Vus vesses munglau veser co il vegliander — isaus giu ualti da rudien — fageva gl’ auter di segls e sigliots! Pir che quels leu denter piertg e purschi! Mo vus havesses era munglau ver la fatscha tarlischonta da Toni! Sc’ina panazun el sulegl!

Buca ditg e Toni seresolva da far in’ emprova cun glieud. Igl emprem ha el zuar targlinau, mo in di ha el ughegiau. Siu fumegl era vegnius ina sera tard dalla lavur e veva ina fom sc’ in uors. Ils auters vevan tschenau ed el metta ina ligiongia sin meisa — ina ualti nera e da tschera pli fasierlia. Il fumegl mira tut surstaus sil Toni, mo vul nuota propi leu. Igl emprem dat el vid las buccadas tschagrun fiers, daditg rufidaus pils tagliors entuorn. Il Toni envida: «Maglia ligiongia; oz has ti stuiu fadegiar aschi avunda; fai buca d’envidar…» — Vonzeivi ch’ ei vegneva nuot auter si meisa, dat el finalmein in tagl ella ligiongia, freda e lai star, mirond da quei suto sil Toni ch’ era buca dalunsch e mirava plitost da quei suro… Basta, il fumegl ha survegniu nuot auter e stuiu ir a letg culla fom el venter.

In per dis suenter era la sira dil Toni, la tatta, stada giu Platta e vegnida a casa cun ina hazra fom. Il Toni ei seresolvius da far oz in’emprova radicala… la finfinala seigi quei mo la tatta, tratga el. Detg e fatg! Dunna ed affons eran aunc sil frust e cunquei ch’ el era persuls culla tatta, ha el fatg da quei beinign si per ella: «Tscheu veis tatta, vus essas era buc in tgaun; ina ga in tec ligiongia fa era bein a vus.»

La tatta ha mirau da quei curios sil Toni, bunamein sco sch’ella less scrutar ord sia fatscha, schebein el seigi buca vegnius ord la suna. Mo encurschend nuot extraordinari, ha ella tagliau giu da quei schenau ina zensla, epi duas, epi treis . . . epi tut, naven d’ ina fin dalla ligionga a l’ autra. Ed ella saveva buca con ludar quella stupenta ligiongia che savessi bunamein esser in andutgel. Havend denton survegniu schitgira, la tatta ha fatg star quei suentermiezdi schi circa quendisch miolas «alv» (latg mischedau cun aua).

Basta, la tatta ha durmiu stupent quella notg e gl’auter di mava ella entuorn viva e viscla, sco sch’ella vess bess diesch onns gia da dies.

Cheu ha il Toni tertgau: Ussa eis ei gartegiau! Sch’ei ha fatg nuot alla tatta, sche fa ei aunc meins a nus tuts! Detg e fatg! L’ emprema dumengia sera suenter quei di leu ha ei dau gnocs e carn vedra! E magliau han tuts da gust e curascha — deno Toni e siu fumegl, ch’eran schiglioc ni in ni l’auter nasfins…

Ed igl ei veramein gartegiau e vargau, sco sch’ei fuss nuota stau zatgei pli hanau. Insumma, la genetscha dil malner ei svanida ord la combra da carn, sco’l zucher ord la zuchrera. Mo in di tut surura — la genetscha era gia daditg magliada rubas e strubas — survegn la tatta stermentusas dolurs e miera el valzen da paucas uras.

Aunc quella sera che la tatta era en bara, va il fumegl tiel patrun e declara categoricamein el mondi damaun per siu fatg! Il Toni fa egls: «Mo sche tgei tratgas e pomai dad ira naven tut surura? Has buca giu bien avunda cun gnocs e carn di per di?» Ed il fumegl cun tschera seriusa sissu: «Manegeis vus forsa, ch’jeu stetti cheu — e magli la tatta in di?

Il crap deltas strias

Glogn 19, p 40ss (Detgas e praulas propi da Medel)

Giu Cuflons sper la punt, gest avon che la via vedra dat ensi encunter Mumpé-Medel, sesanfla in crap, ch’ ei nuota aparti gronds ni schiglioc zatgei ord ils auters. Cura ch’ils da Medel, e mo cu lezs mavan anen ed anora, dev’ei da quels e da quellas ch’eran naschi las Quatertempras, che vesevan a saltond sin quei crap las strias, entochen 34 pèra. D’ enconuscher erien ei buc, mo ei eri da quellas denteren che vevien in ir e demanar exact sco certinas da Medel. Ina ga hagi in mat da Mutschnengia cartiu da haver fastisau leu sia muronza. El laghegia e tila in pleder vi sil crap ellas combas a quella e prendei mira! Gl’auter di mava sia biala zoppa. Cun quella hagi el denton mai pli fatg frina!

Quel dalla scola nera a Sontga Maria

Glogn 19, p 40ss (Detgas e praulas propi da Medel)

Ina ga ei in scolar dalla scola nera staus dus dis a dunsena tier la famiglia digl hospezi da S. Maria. Mintg’ura che deva, scheva el: «Buca quella ura, in’autra!» Cura ch’ei ha dau las dudisch da miezdi, ha el detg: «Quella ura e buc in’autra.» E quella medema ura ha la dunna digl hospezi parturiu in pop.

Las treis filieras sil Crest Peinzas

Glogn 19, p 40ss (Detgas e praulas propi da Medel)

Sil Crest Peinzas era ei ina ga treis filieras che filavan, ina schuengia, l’ autra glin e tschella coniv. In di ei il cavrer ius speras vi e viu ch’ ellas filavan. Ellas empiaran nua ch’el mondi. El di: ad encurir mias cauras. Quella dalla schuengia fa sin quei: «Treis ein pigiuradas sill’ossa!» Quella dil glin: «Vegn ein en davos la Buora.» E quella che filava coniv: «Las autras vegnan tuttas da sezzas.» — Il cavrer ei ius spert vinavon ed ha anflau sco ellas vevan detg. Treis veva gl’uors magliau e schau l’ossa anavos, vegn eran en davos la Buora e las autras ein turnadas da sesezzas tiel cavrer.» — Quei eran treis strias che savevan dapli che mo beiher penn e magliar pulmen. Quella dalla schuengia era da Mutschnengia, quella che filava glin era da Zunins e quella dil coniv da Casiala.

La davosa stria da Matergia

Glogn 19, p 40ss (Detgas e praulas propi da Medel)

La davosa stria da Matergia ei era stau la davosa dalla Cadi. Ella era ida fumitgasa e negin vess detg ch’ei seigi ina stria. In onn fuss ella bugen ida a s. Placi, mo gest il di avon vevan ei da raschlar da nuota puder ventscher. Cura che la fumitgasa ha dumandau il patrun, sch’ ella savessi ir a s. Plazi, ha lez detg, el schassi bugen ir ella, sch’ei fagiessien oz ventschidas cul raschlar: quei seigi denton nunpusseivel e perquei stoppi ella star cheu e gidar a finir damaun. Da miezdi tulanava la zepla traso il patrun da semetter giu e far in sien. Quei pareva curios ad el. Il davos ha el tuttina fatg sco la fumitgasa giavischava. Mo el ha buca durmiu, per mirar tgei la schania fetschi. E cu ella ha cartiu ch’el dormi, ha la stoda aviert la porta-clavau toccadem e dau endisch ga cul risti sil fein. Quel ei sil fiat sufflaus vi e da porta en sil ladretsch, senza tuccar en stumbel! Il patrun saveva buca tgei tertgar, ei denton staus aunc in’uriala avon che sereghegliar per buca schar encorscher zatgei la fumitgasa. Cura ch’el ei levaus si, ha la fumitgasa detg ch’ella hagi seduvrau e rischlau rubas e strubas. L’autra damaun ha il pur lubiu alla da Matergia dad ir a s. Placi, mo lu aunc dau ina brev, ch’ella duessi far aschi bien e remetter els mauns al mistral. En quella vev’el scret, co ei fussi schabegiau cul fein e ch’ei dueigien gest pigliar quella schania, ei seigi ina vera stria. Il salter ha pigliau ella pils cavels e fatg far ella treis turnighels. E lu ha la stria detg: «Jeu sun a mauns, mo dacheudenvi vegn il striegn a vegnir aschi fins, ch’el sa saltar sin las capialas dils signurs en casa-cumin, ch’els gnanc encorschan buc!» — Ed aschia eis ei era daventau.

La stria da Matergia

Glogn 19, p 40ss (Detgas e praulas propi da Medel)

Ina dellas davosas strias dalla Cadi ei stada da Matergia. Ei era ina stoda ed ina fina, che scheva nuota pigliar. Il magistrat ha vuliu far fermar ella, mo quei era pli spert detg che fatg, pertgei quel che peglia ina stria sto tener ferm la gebezza tochen ch’ ella fa treis turnighels ell’ aria. Mo la stria da Matergia, pli veglia e pli mala, mava mai permiez il vitg Mustér ora, sco la via menava, mobein tschuncanava adina quella sper la casa Capeder, sut quella dils Berthers ora. Siu cumpar ei lu in di seschaus giu cul magistrat da metter a mauns la schania al salter grond da cumin, cun vegnir cun ella per miez il vitg si e sper la casa dil landrechter ora. Cur che la stria ei vegnida l’autra ga a Mustér, ha el detg a sia cumar: »Bien di cumar, co va ei?» La stria da Matergia rispunda: «Ei va adina cun l’honur, cun lezza mondel e cun lezza tuornel en ed ord Mustér.» Il cumpar fa lu sissu, ch’ella duessi cumpignar el, els hagien gie da tschintschar da bia ensemen. La stoda veglia ei stada cuntenta dad ir cul cumpar ed ha buc astgau tschuncanar il stardun, per buca far suspects a siu cumpogn. Arrivai avon la casa dil landrechter, il salter peglia ella e tegn ferm, era duront ch’ ella fa ils treis turnighels. Uss era la stria piarsa ed ha stuiu seschar menar, nua ch’il salter ha vuliu. Il magistrat ha lu fatg barschar ella sin in caset-lenn, buca lunsch naven dalla casa dil landrechter.

La tatta stria da Mutschnengia

Glogn 19, p 40ss (Detgas e praulas propi da Medel)

In tschancun dado Mutschnengia viveva ina vieua cun ina tatta e mattascha. La vieua fageva adina cumpignar la buoba la tatta a messa e metteva a pèz alla pintga da star eri en baselgia e far tut quei che la tatta fetschi. Mo la mattatscha ha detg, ella astgi buca far suenter alla tatta, pertgei cura ch’il prer aulzi si quei pop per las combas, hagi la tatta si cumet e ditgi incontinuau: “Guotas e rabaizzas, guotas e rabaizzas.» Autra glieud fetschi buca da quellas caussas. Lu ha la vieua viu, che la tatta era ina stria.

Igl engrazieivel schuldau

Glogn 19, p 40ss (Detgas e praulas propi da Medel)

Igl onn dils Franzos ha era in da Medel battiu ella battaglia da Domat.

Sortend el la damaun marvegl ord il vitg da Rehanau, suenter haver durmiu enzacontas uras sper ina buot giu, schulavan las ballas dils Franzos buca legher sur ils tgaus ora. Tuttenina senta el ina murdida recenta sin tgau; el sgratta e pren mira! En quei mument croda in hazer pluglun sper ses peis giu. El seplacca per smaccar il schani cul polisch, mo enaquella sgola ina balla fil a streh sur siu tgau ora e mazza siu vischin en in dai. Vesend quei il da Medel, eis el tut commovius, pren bufatgamein si da plaun il plugl e metta quei puspei sin tgau e di: «Perquei che ti has salvau a mi la veta, regalel jeu a ti la tia; mo lai buca traplar pli, nibutscha ch’jeu pudess nuota enconuscher tei pli!»

Il prudent semiader da Bisquolm

Glogn 19, p 40ss (Detgas e praulas propi da Medel)

Inaga era Bistgaun Biziechel da Bisquolm staus o Mustér e vegnius ella notg ch’el ha stuiu maner leu quella sera. El ei ius en tier la Balugna, ustiera da Gonda, e stuiu durmir ella medema combra cun in Tuatschin ch’era medemamein nuota vegnius a frida dad ir a casa quella sera. Cura che Bistgaun Biziechel da Bisquolm ei staus setratgs ora entochen silla camischa, ha el, avon ch’ira enta letg, tratg en ses calzers da rabaizzas e mess si la capiala bergamasca. Smarvegliond caussas ha il Tuatschin emparau: «Dieunuardi, tgei‘ fagiais era co?» Ed il da Bisquolm cun tschera seriusa: «Jeu stoi esser prudents. Jeu hai semiau tschei onn, ch’jeu seigi passaus sin glasa e buca daditg, ch’in utschi hagi schau dar ina puglina sin miu tgau blut. E quei ha fatg tondanavon mal la piutta e ferdau aschi tarladiu, ch’jeu mondel mai pli a letg senza ver en calzers cun guotas dad ala e sin tgau la capiala bergamasca!»

1 2 3