Mustér, il Mars 2018

Stimatissim Signur!

Nossa pleiv de S. Gion Battesta a Mustér ha ual avon dus onns giu la sventira de piarder siu oreifer zenn grond, ord motiv ch’ el ei annetgamein sefess. La pleiv steva cheutras avon l’alternativa: u de vender il zenn sco metal veder e spetgar giu megliers temps per in niev cul, ne de puspei schar cular el ussa e surprender ils gronds quosts persuenter.

Sefundond sil general giavisch e sperond sil general agid ei la pleiv denton sedecidida de schar far ussa in niev cul essend che tut sesnueva avon il pertratg, de forsa stuer schar midar nies anteriur venerabel zenn grond en canuns ne auters uaffens d’ uiara e prevedend, ch’il spetgar giu megliers temps per il cul savessi probabel cuzzar aunc ina gronda retscha d’ onns. Ins haveva generalmein gia schau encrescher fetg mo duront quei quort temps per nies «S. Gion Battesta» era senza la commuentonta vusch dil qual ei pareva de dar neginas fiastas pli e negina beneficenta condolientscha tier mortoris e sepulturas, numdi aunc stuer spertgar onns ed onns sin quel, avon ch’ils megliers temps arrivien.

Ils quosts de cular ussa il zenn ein dentuorn, conform las relaziuns presentas, fetg considerabels e vegnan a muntar sin d’entuorn de 9000 fr Avista della fetg precara situaziun finanziara de nossa baselgia parochiala de S. Gions han ins stoviu prender il refugi tier la caritat e beneficenza publica per cuvierer quels quosts dil zenn e fatg ina collecta casa per casa a Mustér, la quala ha tochen ussa giu in bi resultat.

El medem temps ha il Cussegl della pleiv secartiu d’astgar prender la libertat ed era sevolver cun la supplica per ina modesta unfrenda per il niev zenn grond tier presents ne anteriurs burgheis de Mustér d’ordeifer, sco era tier amitgs, specials ne buns enconuschents de Mustér, ord qual motiv nus sevolvin cun questa circularera tier Els.

Il zenn niev ei daquort vegnius culaus ad Aarau dalla firma Rüetschy e dei, per nies grond legherment, tenor pareri dils resp. experts esser bein gartiaus. El arriva en quort a Mustér e vegn benedius en cheu solemnamein ils 25 de Mars, suenter viaspras, fiasta dell’ Annunziaziun de Maria, sin il qual di il zenn vegl ei avon dus onns staus sefess. Nus selubin d’ era envidar en Els tier tala solemnitat de nossa pleiv.

Nus sperein ch’ Els prendien buca si en mal nossa supplica e sch’ Els han la buontat de corrispunder a quella tenor Lur beinmanegiar, sche exprimin nus gia ordavon in cordial «Dieus paghi!» persuenter.

Cun distinguida stema

Per il cussegl della pleiv de Mustér:

Il president:

GIUS. CONDRAU, Red.