(ord GR dils 28 da fevrer 1967)

Igl aviun tudestg, ch’ei sparius la gievgia vargada [rem. 23-2-1967], ei vegnius anflaus al pei meridional dil Péz Acletta settentrional da Mustér. Cun gronda stenta ein las 2 baras vegnidas deliberadas ord las ruinas e transportadas cun helicopter la sonda allas 15.30 a Mustér.

La gievgia sera tard annunzia Kloten, ch’in aviun tudestg, sin viadi da Genua a Düsseldorf, seigi sparius. Allas 17.04 hagien ins aunc observau igl aviun sil spectrum dil radar. Dus vischins da Mustér, Giachen Fry e Luis Levy, san dar bunas informaziuns. Entuorn las 17.00 han ei udiu in aviun ella brentina sur Mustér e suenter in ferm fraccass el contuorn denter il Péz Cavardiras Péz Acletta e Péz Ault. Lur indicaziuns ein da gronda muntada. Grazia a lur precisas indicaziuns san ils dus helicopters in da militer ed in digl uffeci federal d’aviaziun concentrar lur retscherca sin quest territori. Per cletg ei l’aria clara e sereina. Allas 12.45 observa in dils pilots las ruinas digl aviun al pei dil Péz Acletta.

La colonna d’agid da Mustér vegn ladinamein transportada el liug della disgrazia. Igl aviun, muort la vchementa curdada, ei sefuritgaus ca. 4,5 m profund ella neiv d’in cufflau. Gnanc raschieni d’anflar zatgi en veta. Ei vegn denton confirmau, che mo dus passagiers sesanflavan egl aviun. Las duas baras dil pilot capitani Wolfgang Koeppen (n. 23.4.1926) e dil Copilot Frank Simat (n. 24.2.1940), secattan giufuns la maschina, che stat cul tgau anavon ella neiv.

Igl aviun, ch’ei smardigliaus e smaccaus ensemen sco ina scatla da sardinas, sto vegnir scarpaus quasi toc per toc ord la foga avon ch’ins possi tier las duas baras, fermadas sil sez ella cabina digl aviun. Ins sto luvrar uras ora cun pala e zapun, e segidar cun suga d’ itschal e «Hategger» e d’ina apparatura speciala per tagliar il stuors ed itschal che ensiarra las duas unfrendas della catastrofa. La sonda entuorn las 15.00 pon ins rabitschar las baras ord la profunditad.

Igl aviun disgraziau auda alla firma «Benteler-Werke» a Bielefeld, Germania. Ei setracta d’in aviun dil tip «Piaggio 166». La maschina ei vegnida revedida dalla fabrica ell’Italia. Ils dus aviaturs — pilot e co-pilot — duevan sgular culla maschina dalla Italia sur las alps en Germania. Arrivond viers la cadeina da cuolms ca. P. Borel — P. Rondaduras annunzia il pilot per radio alla plazza aviatica da Kloten ch’el hagi certas difficultads. El rabetschi sia maschina buca silla altezia giavischada. El mument critic tschessa igl aviun dal «Radar». Igl ei la catastrofa. Quasi en medem temps cun quei aviun ei in secund aviun della medema firma sgulaus sur las alps en ina altezia da biabein 4000 m e mitschaus malgrad l’aura disfavoreivla e spessa brentina.

Igl uffeci federal d’aviaziun, che ha giu tarmess ladinamein dus helicopters alla tscherca dils spari, interquera ussa intensivamein ils motivs della digrazia. In representant digl uffeci ei staus il venderdis e la sonda a Mustér ed al liug da disgrazia.

Il pilot Koeppen banduna dunna ed in affon pign, il copilot Simat ei maridaus per dacuort. Las famiglias en malencurada engrazian als dus vischins che han annunziau lur observaziun, alla polizia cant. a Mustér, als ufficials, sco era en special alla colonna d’agid Mustér per lur agid. R. I. P.