della
Viafier Glion–Mustér
ils 30 de Fenadur ed igl 1 d‘Uost 1912
Val renana
Sursilvania
Tochen sum pos fiasta far:
Silla strada
Enferrada
A vapur vegn oz il carr.
Vitgs e spundas
Vals profundas
Cun in schul salld’ il tren;
Leventada,
Spuentada
Fui l’ utschlegli’ empau naven.
Las ureglias
De merveglias.
Lieurs surstadas, uss gizzeis;
Tais en tauna
Umbrivauna,
Tgei de quei pomai tertgeis?
Muntanialas,
Sillas palas
Stei von rusna e tedlei,
Tgei schuladas
Tras valladas,
Tgei suns novs leu giu ei quei?
Selvas bialas
E pardialas
Isoladas buca pli,
Traversadas,
Visitadas
Selegrei uss mintga di!
Sper Sontg’ Onna
Uss sehona
De bia hosps il bi Ischi;
Sco sittada
La tillada
Va tral cor de la Cadi
En l’ altezia
Cun franchezia
Va il tren sur artgs e punts;
Precipezi
Plein snuezi
Ves’ il viandont giufunds.
Desertina,
Buc adina
Eis ti pli en in desiert;
Dubla via
En ca tia
Al temps niev ti has aviert.
Rein selvadi,
Sil viadi
Pos ti buca suenter pli;
Prescha gronda
Oz damonda
Il progress, engiu, ensi. —
Val grischuna,
L’jerta buna
Lai mai mai naven menar,
Silla strada
Enferrada
Lu da cor pos fiasta far!
Fl. Camathias