ord Gasetta Romontscha dils 20 da matg 1926

La plievia quasi constanta de 3 dis e 3 notgs ha la sonda e dumengia caschunau bovas e burasclas en plirs loghens de nies cantun, ell’ Engiadina, Val Müstair, vallada dell’ Albula ed era en Surselva.

A Mustér ha il tgiern de fiug alarmau la glieud la dumengia allas 6 d. d.: La bova della Valmala fuva dapi 1868 per l’empremaga puspei en moviment, veva gia bess ina massa material suenter claustra giu e dallas vias della claustra giudo el vischinadi de vitg. Gl’ emprem pertratg fuva la tema, ch’ ei savessi aunc vegnir in bien ton material dapli. Cun bravura han ils umens luvrau la

entira damaun ora per tener a mistregn la massa d’ aua, tratsch e crappa che sezulava neuagiu. Plirs umens han fatg il liung tur dalla val si, per inspectar la situaziun sisum la val, sils schinumnai „Fussaus“. Per ventira fuvan quels intacts. La bova seconponeva per gronda part da material rimnau el vau della Valmala e ses dutgs laterals. Negins sbuaus. Grazia alla nova canalisaziun dell’ aua atras il vitg ha, suenter l’ emprema burascla, l’ aua della bova suenter 2 uras cerca saviu vegnir tratga giud las vias, ch’ ella veva per part lavau ora e per part innundau malamein.

Duront ch’ ils vischins fuvan ferm vid la lavur per dumignar la bova della Valmala ei dall’ autra vart dil Rein in sbuau ius cul clavau dil mises de „Tscharscher-ner“. Ord in auter baghetg zun pereclitau han ils tiers stuiu vegnir liberai. — Dadens e dado Mompe-Medel ei iu sbuaus ch’ han cuvretg en las cultiras.