„A Trun sut igl Ischi
Nos babs ein serimnai,
Da cor ein els uni,
Cun forza tuts armai.“
Mo in quort termin separa nus dal tschuntschienavel retuorn digl onn de fundaziun della Ligia Grischa. La Ligia exista buca pli en sia organisaziun originala. Sco la Ligia della Casa de Diu e la Ligia dellas Diesch Dertgiras eis ella seunida compleinamein cun il cantun Grischun, al qual ella ha dau il num. Mo nuotatonmeins astgass ei esser commensurau, de celebrar vengonzamein igl anniversari de quella viulta historica d’ ina gronda part dil cantun. Il serament de fideivladat dils 16 de Mars 1424 sut igl Ischi de Trun ha ge schau nescher la Ligia Grischa, ch’ ei durond tschentaners carschida e sesvilupada per libertat e prosperitat della tiara, preparond l’uniun cun las duas ulteriuras Ligias e la suondonta incorporaziun sco cantun unitar alla confederaziun.
Sco la fiasta commemorativa della Tgalavaina, havess quella festivitat igl intent de frestgentar e cultivar sin modesta moda il spért patriotic en engrazieivla memoria dellas ovras de nos babuns.
Ils temps ein vargai, nua ch’ ils deputai della Ligia sura mavan e vegnevan dallas dietas della ligia a Trun, per eleger lur magistrats, decretar tschentaments e tener dertgira. Vit e bandunau eis ei vegniu a Trun ella sala de dieta, cun siu ornament ded uopens en la „Cuort“ claustrala dil prenci-avat de Mustér.
Sch‘ igl ei, sut talas circumstanzias, seformau in comite iniziativ ella anteriura residenza della Ligia Grischa, per far ils pass preparativs, per la celebraziun della 5 avla fiasta seculara dil serament de Trun, sche po quei parer meins immodest, che ughiau.
Per sligiar quei grev pensum vegn denton sefidau sin schi generala participaziun sco pusseivel ord tuts cumins dell’ anteriura Ligia Grischa e sin in vigurus susteniment finanzial e moral vid ils sacrifecis necessaris da part d’ autoritats e privats, dalunsch e demaneivel. Mo sin tala moda ei la festivaziun realisabla.
Viva la Grischa!
Cun salid patriotic
Trun, ils 10 de Schaner 1922
Il comite iniziativ.