Ord la Gasetta Romontscha dils 31 da december 1919:

Ella spuretga vall Stallusa, sper Mustér, ei vegniu giu ina gigantica lavina, ch’ ei sederschida sur la punn crapp dil stradun, destruend ils parapets, e savonzada sut il vischinont, lartg viaduct de viafier ora tochen giu Rhein, menond bia material e lenna. Ulteriuras disgrazias ha quella per ventira buca provocau. Ins seregorda buca de semegliontas lavinas en tal liug.

En bia loghens ha la nevada e la suondonta presenta marschauna cun plievia caschunau auas grondas ella bassa e smanatschau prighel. Era a Glion ha il Rein contonschiu quels dis ina altezia darar sudida.

Ord la Gasetta Romontscha dils 18 da zercladur 1919:

Il venderdis vargau ein nies stiman hotelier Sgr. Fl. Tuor dil „Disentiserhof“ a Mustér, strusch staus returnaus da Tunis, e sia familia vegni surpri dalla tresta nova telegrafica, che lur fegl Jean Antoine, in stupent giuven de 17 onns, dapresent a. Vitznau, Lucern, seigi negaus leu enten far bogn el lag. La disgrazia ei pari succedida tras malsinschinar d’ in siu compogn, che teneva dalla riva ano il giuven Jean Tuor, aunc nuncapavels de senudar, vid ina suga entuorn veta. L’aua haveva sper tala riva l’altezia de 6 meters, in liug, che havess doviu vegnir sclaus per nunexercitai. La bara ei immediat vegnida anflada. La domengia ei quella arrivada a Mustér ed jer vegnida surdada cheu alla fossa sut numerus conduct e generala condolientscha. De ses anteriurs conscolars della scola claustrala han portau e compignau cun bandiera velada il giuven defunct tier il ruaus el senteri a S. Gions. Jean Tuor haveva fatg la scola reala en claustra a Mustér e lu el collegi a Sviz e concludiu leu onn stad la partiziun mercantila cul diplom; silsuenter absolviu quest unviern la scola d’ hoteliers a Lucern e sesanflav’ ussa per instrucziun practica en in hotel a Vitznau, per en quort daventar ina buna petga dil bab en sia hoteleria a Mustér e Tunis. Nies segner ha giu destinau autruisa — el vegn era a consolar la combrigiada familia!

Ord la Gasetta Romontscha dils 13 da mars 1919:

El vitg Mustér ei uss’ il diember d’ abonnents de telefon carschius sin 25. Dapli ein Mompe Medel e Segnas uni tras ina staziun cun la centrala, e presentamein han ne obtegnan er’ aunc Madernal ed Accletta communicaziun telefonica, per ucclauns in’avantagiusa commodeivladat.

Naven dagl 1 d’ Avrel ein il biro de telegraf e telefon nuninterruttamein aviarts dallas 7 d. d. tochen las 9 della sera.

Ord la Gasetta Romontscha dils 13 da fevrer 1919:

Legend l’ jamna vargada en la Gas. Rom., ch’ ei vegni dau ina producziun teatrala a Segnas en quei idyllic vitget montognard al pei digl imposant „Bostg“, ha bein enqualin scurlau il tgau e fatg bucca de rir. Quei fuva in evenement tut niev. La simpatia per la curaschusa societat de mats e las merveglias han denton dau comba a biars convischins de pelegrinar domengia ils 9 d. q. encunter Segnas.

La ualti spaziusa sala de scola ei semussada bia memia pintga per saver tschaffar tuts ils aspectaturs, ei ge il diember de quels carschius sil dubel della prevedida frequenza. Cun in frestg bi cant ein las producziuns vegnidas aviartas. Gia quella avertura ha fatg svanir ils dubis ariguard las suondontas prestaziuns. Nus savein facticamein constatar ch’ils giuvens acturs han capiu de tener spaniau igl auditori durond 2 uras sil pli ault grad. Las cordialas risadas ed igl applaus han documentau, ch’ins seigi staus satisfatgs dallas bein reussidas e sche ge humoristicas, sche, tonaton instructivas producziuns. Il giug fuva en general naturals, capo qualitat tier producziuns teatralas. Era il bi cant sut capavla direcziun e las claras sonoras vuschs, han plaschiu oreifer al publicum. Tier eventualas producziuns supplementaras giavischein nus als teatrants de Segnas puspei sala fulenada, els meretan veramein quell’ attenziun. En special recommendein nus a quella giuvna societat de cultivar vinavon cun medema premura il cant, seigi popular ne ec- elesiastic, las forzas mauncan ge buca leutier ed il proverbi tudestg di: „Nu’ch’ins conta, sesanflas ti denter buns; schliats carstgauns han neginas canzuns“.

Ord la Gasetta Romontscha dils 24 d’avrel 1919:

La domengia vargada han ils purs della vischnaunca de Mustér fundau in’ Uniun purila. Era il pur vesa plaun e plaun en, che la forza schai ell’ uniun. Ord igl intent tschentaus el statut vesein nus il vast camp de lavnr. Semegliontas organisaziuns tegnan ensemen, sclareschan, pertgiran ils interess purils ed empeilan tier organisaziuns pli grondas. Tras in inserat dat il comité part, ch’el cumpri pils commembers cultem artificial etc. Quei aber mo sin empustaziun ed aschi lunsch sco igl ei pusseivel de survegnir.

Ord la Gasetta Romontscha dils 5 da fevrer 1919:

Ils 2 d. q. ei seconstituiu a Mustér ina „Uniun dellas classas d’ acquist e gudogn“. Quell’ union ha igl intent de cooperar en in senn e spért cristian e de defender ils interess economics dellas sura numnadas classas, senza denton vuler esser agressiva viers autras classas dil pievel. Il plan de lavur ei tschentans sin fondament de raschuneiviadat, de dretg e giustia. Viver e schar viver duei esser la parola della nov‘ uniun, la quala dumbra gia varga 70 commembers.