Gasetta Romontscha nr. 2 dils 10-1-1901

Posteriuramein relatein nus, ch’il re nomau componist Dr. Josef Rheinberger de Vaduz el yischinont principat Lichtenstein segi morts ils 25 de Nov. a München ella vegliadetgna de varga 70 onns. Sia mumma era de Mustér, ina sora dil defunct domdecan J. A. Carigiet de buna memoria, ch’ ha avon che vegnir canonic residenzial a Cuera giu pastorau ina rietscha d’ onns la gronda pleiv de Schaan sper Vaduz. Rheinberger sedestingueva gia da pign ensi tras ses admirabels duns per la musica. Dad 8 onns sunava el l’orgla en sia baselgia parochiala e ve- gnent el sil conservatori a München ha el mo cun 15 onns diregiu leu in famus concert! Sias composiziuns musicalas eran renomadas e savens scriveva sia consorta, figlia d’ in gieneral, il text per quellas. Muort sias grondas prestaziuns eis el vegnius honoraus cun uordens dal retg bavares, dal papa etc. e la Universität de München ha regalau el cul doctorat. El seteneva si a München e perquei ha el fatg a quei marcau in legat de 100’000 marcs per caussas de beneficenza. Per sia vischnaunca nativa Vaduz ha el destinau 30’000 marcs, per mintg’onn de Nadal schar parter ora il tscheins de quei bi capital als pli vengonzs paupers. Possi la musica celestiala ed il cant angelic legrar il me-riteivel defunct!