Sarament dil mistral

Per l’emprema ga, Vus vegnis ad engirar che Vus leies render laud ed honur a Diu; e la s. cardientscha catolica suenter Vies meglier puder e saver cun tutta premura mantener e promover; applicar il bien e tschessentar il mal.

Per l’autra ga, Vus vegnis era ad engirar che Vus leies mantener e promover ils dretgs e las frietads dil Cumin e della Casa de Diu.

Per la tiarza ga, Vus vegnis era ad engirar che Vus leies esser in ver, nunpartischont mistral; cassar donn, menda e zanur; orfens, vieuas e mintgin en il siu defender e proteger.

Per la quarta ga, Vus vegnis plinavon ad engirar che Vus leies esser in ver, nunpartischont Derschader en tuttas caussas ch’ avon Vus comparan, seigi en truaments ni en cussegls, tenor Vies sarament; e cura ch’ ei vegness sin Vus de dar la spartida, sche leies Vus, tenor Vies bien giudezi e Vies sarament, tener da quella vart nua che Vus manegieis ch’ ei seigi la raschun ed il dretg.

Per la quinta ga, Vus vegnis milsanavon ad engirar che Vus leies palesar tuttas caussas ch’ ein de palesar, e quei ch’ ei de tener secret e tschellau tener tschellau e purtar cun Vus sut tiara; ed ordinar tuttas cumandadas e scumandadas tenor uorden e demenar.

Per la sisavla ga, Vus vegnir ad engirar che Vus leies al Cumin tener in dretg e recli quen de Vossas entradas ed expensas, tener en bien guvern il sigil de Cumin e buca sigilar caussas d’ impurtonza senza savida e per cussegl dil ludeivel magistrat.

E sche Vus leis quei salvar cun ils fatgs, sco jeu hai proponiu cun la viarva, sche vegnis Vus a tener si treis dets enten Vies maun dretg e repeter quests plaids:

Tut quei che Vus veis proponiu culs plaids — sche vi jeu salvar cun ils fatgs — suenter miu meglier saver e puder — en tuttas caussas da buna fei e senza malart — Aschi per ver che mei gidi Dieus, la Sontgissima Trinitad! — 

Nossadunna e tuts ils Sogns roghien per nus. Amen.