Quel dil stumi serrau

Glogn 19, p 40ss (Detgas e praulas propi da Medel)

Ina ga er’ei in mat vegl da Curaglia che steva cun sia sora e veva bien e tgei ch’ el leva. El schava plascher in bien migiel vin da gentar e da tscheina, mo cul temps eis ei vegniu ord il migiel ina mesira ed il davos pli ch’ina e pli che duas… Havend nuota fin d’alzar traso il det pign, eis el vegnius quasi malsauns; siu nas tarlischava stgir-blau e sia bucca sbabava. Vegnend mender e mender cul schani, ei la sora ida in di giu Breil tier la Babetta Balletta e priu plaid e cussegl. Lezza ha dau la seriusa cunzina: «Silpli in migiel a di e suenter la tschavera gnanc stel pli; lu ei il stumi serraus!» Quei onn per Dumengia dil Carmel veva la sora fatg in stupent barsau-nuorsa ed il frar ha buiu leutier in bien migiel vin. Havend cudizzau quell’ uisa la seit, ha e1 fatg ira in buobet vi tier il sur Gualino per in secund quintin. Vesend quei sia sora ha la detg: «Giachen, Giachen! Lai uss esser per bien! Sas buca che la Babetta ha detg: Suenter la tschavera ei il stumi serraus!» Sin quels plaids ha il Giachen mirau gl’emprem tut carin sin sia sora e suenter sil quintin, epi detg: «Hagies nuota quitau, mia cara soretta! Seigi il stumi péra serraus, quei quintin cheu damognel jeu aunc maneivel e bein atras la rusna dalla clav!»

Enzacons solits conclus da vischnaunca

Glogn 19, p 40ss (Detgas e praulas propi da Medel)

Avon onns vegnev’ ei fatg vischnaunca pli savens ch’ ozildi. Ins tractava era damondas pli specialas, che mo quellas da vias, piogns, uauls e pastiras. — Ina ga hagi in da Muts priu ina talpa viva cun el e lu fatg valer sin vischnaunca, che quei seigi in animal infernal che sappi far nuot auter che «retscher manteuns tratsch». Quei seigi bien per nuot auter che per sfular faultschs. El fetschi la proposta da satrar viva la talpa; quei hagi ella meritau. Quei meini ha pigliau il pli e la talpa ei vegnida satrada viva, sco’l da Muts veva proponiu.

In’ autra gada ei in da Zunins vegnius cun in sprer viv sin vischnaunca. Quei lader da gaglinas seigi da truar alla mort, nibutscha ch’ ils cots hagien buca ditg lavur pli. Suenter haver disputau vi e neu ditg e liung, han ins concludiu da better el vivs sur la greppa giu. Ed aschia eis ei daventau. —

In onn da scartezia da fein han ins era giu endamen sin vischnaunca tgei pigliar a mauns en tala miseria. Far daischa? Far netgs? Co sestelegiar? La finfmala ha in da Tagiola proponiu che mintga pur tegni diesch vaccas ed in taur! E quei ha pigliau il pli. — Quei onn carschev’ei in techet pastg sin clutger. «Quel han ins betga vuliu schar lo. Per maglià giu quel han ins priu e ligiau ina seua ad in bov enturn culiez e tratg se el per scha maglià giu. Cur tg’el ei steus tratgs se tochen tiel pastg, catschav’el ora brav la liunga. Vesend quei, tut che greva: «Mirei tgei cueidas ch’el ha schon!» —

In’ autra ga eran ei puspei sin vischnaunca ed alla fin da quella ha in da Casiala manegiau la baselgia parochiala seigi vegnida baghegiada memia engiu; el fetschi la proposta — mach’ei seigien grad tuts ensemen — da dar in detg stausch ch’ella seruchegi empau plinensi! Detg e fatg! Ils valerus tilan ora ils tschops, tschentan quels in tschancun sur baselgia giun plaun, per mirar con la seruchegi. Duront ch’ei eran davos e stuschavan ha in dils pli mals priu naven ils tschops e fugius cuntut. Havend stuschau ina bun’ura va in si per mirar e cu’l ha buca viu ils tschops, grescha el siper tschels: «Te saperlot! Detga forza, ils tschops ein sutein!»

Quel che veva engulau la groma

Glogn 19, p 40ss (Detgas e praulas propi da Medel)

Quella detga ch’ ei probabel la pli enconuschenta ord la Val Medel, lein nus schar raquiutar sur Giohen Venzin en «dialect da s. Roc»: «Cur tge la veia mava sur Vergera, stev’ei lo sper quella in bi tgaplut. In da, usche di ins, e in um ius speras o cun ina breinta groma se dies, per purtar o Musteir. Ei era il fenadur e fetg tgeud. Empau pie en se enturn las muschnas er ei bia farbeuns. El veva seit e per dustar quella ha el mess giu la breinta el tgaplut ed e ius se e magliau farbeuns. Denton ei in euter vegnius per quella veia, ha aviert se gl’uvierchel e magliau bravamein groma, epi strihau enturn la bucca da Niessegner. Cur tg’il da Medel e vegnius anavos per la breinta ed ha viu tge Niessegner veva groma enturn bucca, ha el cartiu tge quel hagi magliau la groma ed ha priu e tratg el dallas pleuncas giu sehend: «Sehe te eis betga pie prus tge quei, sehe va da co giu!» (Il raquintader fa la fetg buna remarca: Quella detga ei probabel vegnida si a motiv dalla translocaziun dil caplut giu dasperas il stradun niev dadens ils tunnels!)

Tschamun da Tscheps sin viadi encunter Mustér

Glogn 19, p 40ss (Detgas e praulas propi da Medel)

A Tscheps en Val Medel viveva in da 90 e varga onns ch’era aunc mai staus o Mustér. In onn da sogn Placi, ch’ils biars eran gia i a sogns, ha er el priu vonzeivi siu fest ed ei serendius entochen osum Vergera e vesend el da cheu anora casas dador Mustér, ha el exclamau smanond siu fest plein smarvegl: «0 Dieus co’l mund ei gronds, ei dat aunc tgasas sut Musteir!»

La pli mala da Durschis

Glogn 19, p 40ss (Detgas e praulas propi da Medel)

Ina dunna da Durschis ei ida inaga o Mustér ed ha cumprau carn per in barsau da perdanonza. Ida ch’ella era entochen silla Punt sontga Gada, eis ei vegniu endamen ch’ella hagi emblidau da dumandar co cuschinar. Ella metta il barsau sut in draus e tuorna dabot vi Mustér per dumandar co ins fetschi da barsar. Returnond po ella ual aunc ver co in tgaper sesaulza ell’aria culla carn en siu hec. Cheu ha ella griu suenter beinmanegiond: «Te lai star quella, te sas betga co ei secuschina!»

Vacca, tatta…, vacca, tatta…, tatta, vacca!

Glogn 19, p 40ss (Detgas e praulas propi da Medel)

Inaga veva in da Catinauns la vacca e la tatta ch’eran malamein malsaunas. La tatta era veglia ed ei era buca da sesmarvegliar ch’ella pudeva strusch tschintschar, nundir runar peis. Ell’ era giuaden tochen funs enta letg e tremblava sc’in lamegl sbrinzlont giudem il tschep-tschera. La vacca burleva dil madernatsch e seruclava mintgaton sin punt che la cadeina bunamein strunglava vi ella diltut. En sias fetgas e pitgiras ha quel da Catinauns clamau siu mat e cumandau ch’el mondi dabot o Mustér per medischinas per la vacca — e mach’ ei mondi en ina, sappi el era aunc far dar enzatgei per la tatta. Il giuven ei ius sil fletg sco’l bab ha detg. Bandunond Mustér vev’ il docter dau la cunzina: Hagies per l‘ amurdiu quitau e buca sbaglia las medischinas. Returnond sur Vergera siden, entupav’enqualin il mat en suadetsch, che teneva en in maun il guoter da medischinas per la vacca ed en l’ auter quel per la tatta e che scheva ad in dir, sco da recitar la litania: « Vacca, tatta…, vacca, tatta…, tatta, vacca! Digl ir ch’ei mava, eis el tutenina daus en venter e lavond puspei en pei, ha el continuau endretg il moviment dalla bratscha, mo buca quel dils plaids: « Vacca, tatta…, vacca, tatta…, tatta, vacca, tunav’ei uss entochen a Catinauns. Arrivaus si casa, el ha dau la medischina dalla vacca alla tatta e quella dalla tatta alla vacca. Mo prendei mira! La vacca ei crapada e la tatta ei levada! Ed il vegl da Catinauns di, dond il tgau: «Quels da Mustér san far diltut, deno endretg!»

Co ils da Mustér ein vegni en possess dils dretgs dell’ alp Pazzola

Glogn 14, p. 112s (Detgas e praulas ord las alps da Mustér)

La tradiziun raquenta ch’ils da Medel possedevien all’entschatta tut persuls l’Alp Pazzola. In di ch’il signun levi caschar, hagi el observau silla tschaghegna in hazer schnecun tut ner, in dalla spezia ch’ins numna aunc oz tier nus „schnec da Medel“. Il signun, sco era l’ulteriura fumeglia, hagien pigliau ina stermentusa tema, cartend che quei schnecun ner sc’in cotgel e cun cornas sc’in bov sappi esser negin auter ch’il da cornas en persuna. Vulend spuentar il schani giud la tschaghegna, hagi quel fatg stem da quei nuot; anzi, el hagi entschiet a catschar las cornas aunc pli da curascha. Vesend quei, il signun hagi tratg las combas davos si e seigi currius — mo puder — da Stagias oragiu e giu encunter Mumpé-Medel e la fumeglia suenter, sco sch’ei fussien dai ord la grazia da Diu. Dagl ir ch’ei mavien, tras draussa e migeunca, seglievi mintgaton in rom el dies; uss ad in e gleiti a l’auter. Els eran aschi tementai da quei ch’els cartevien sontgamein: quei seigi il schnec che cuori suenter, dend mintgaton cun sia corna el dies.

Arrival a Mumpé-Medel pli morts che vivs, hagien ei raquintau leu lur stermentusa historia cul suadetsch da tema ed anguoscha giu per la fatscha. In da Mumpé-Medel — in empauet meins temeletgs, ch’ils da Medel — hagi immediat sminau da tgei ei setracti. El seporscha als da Medel da scatschar il schnec per ina e per adina sch’ei dettien miez lur alp Pazzola „als da Su“ (q. v. d. als da Mumpé-Medel, Clavaniev, Acletta, Cuoz, Buretsch e Segnas!) Ils da Medel ein stai cuntents da quei; mo vegnir libers dil da cornas! Sin quei ein ils da Mumpé i si ed han fatg fugir il schnec giud la tschaghegna e dapi lu posseda Mustér 73 dretgs dall’alp Pazzola, ferton ch’ils Medelins han da quella mo 72.

Quel dalla capetscha cotschna en Cristallina

Glogn 14, p. 112s (Detgas e praulas ord las alps da Mustér)

L’alp Cristallina, ch’era antruras in’alp da Medel, mo ch’ei ussa dapi tschentaners alp da pursanavels da Mustér, veva fetg bia da far cugl um selvadi. Ina ga han ei denton era viu in dalla capetscha cotschna. La fumeglia era gia en treglia e vev’entschiet a durmir, ch’ei ha fatg ina stermentusa canera si sur tegia, sco sch’ina termenta bova fuss rutt’ora e less satrar tut. La fumeglia sededesta e vesend tras las plattas dil tetg che las steilas tarlischavan vid il firmament, han ei pegliau aunc pli gronda tema. Sulet il signun ha ughegiau da siglir ord treglia; mo tgei vesa el sin esch-tegia? In hazer umeneri cun si capetscha cotschna. El di quei al paster, mo sco che lez ei staus ord treglia, ei quel dalla capetscha cotschna staus svanius.

Il fegl malengrazieivel

Glogn 5, p. 4ss (Enzacontas detgas e praulas ord la Val Medel)

Inagada seseva in um ed ina femna da Drual avon casa e vevan in caduscal barsau avon els, il qual els levan magliar ensemen. Cheu vesa igl um che siu bab vegneva speras neu ed el zuppa dabot il caduscal per buca stuer dar ina buccada al vegl. Il vegl vegn neutier, dat in per sitgs ord in ruog dad aua e va. Ussa vul il fegl puspei metter il caduscal barsau si meisa, mo pren mira! Ord il barsau er’ei vegniu in tarladiu rustg che seglia al giuven enamiez la fatscha e serenta leu sco sch’el fuss culaus e vul nungrazia ir naven. Leva zatgi catschar naven el, sche mirava quel sco in tissi e fageva tschera da siglir en, aschia che negin ughegiava da tuccar en el. E quei tarladiu schani d’in rustg stueva el perver mintga di sch’el leva buca vegnir ruius si dad el. Ed aschia ha quei fegl malengrazieivel stuiu ira cun grond malruaus tras quest mund.

Il Met

Glogn 5, p. 4ss (Enzacontas detgas e praulas ord la Val Medel)

Ei era inagada dus perveseders da Curaglia che mavan vi Mutschnengia a maner ora en nuegl. In da quels veva mintga notg il fulet ch’el stueva bunamein stenscher. Ina sera van els pli baul a maner e fan giu da durmir el medem nuegl, pertgei ch’els sminavan ch’ei seigi buca tut schuber. Els festginan da perver epi staupan ora bein e sco e s’auda tut las ruosnas dil nuegl; sulettamein ina ruosna han els fatg cun in trader tras la palaunca. Las medemas uras sco gl’ordinari vegn ei da quella ruosna giu ed in dad els survegn il fulet, che strenscha bunamein vi el diltut. En quei mument cuora l’auter vi e staupa si la ruosna cun ina clavella. La damaun era ina gronda e biala matta en nuegl che saveva buca romontsch. Pér cu l’auter ha tratg la clavella ord la plaunca ei la matta svanida.

1 2 3