L‘ emprema orgla da 1822
Segnas ei gia da vegl enneu stau in vitg cun gronda tradiziun musicala. Quei vesan ins era sch‘ ins contempla las orglas dalla baselgia da Segnas. Dall‘ emprema orgla a Segnas savein nus atgnamein fetg pauc. Ella ei vegnida construida igl onn 1822. Ei vegn consignau ch‘ il construider hagi vuliu imitar las vuschs profundas dils cantadurs da Segnas[1]. Quei fatg lai sminar ch‘ ei deva gia da lezs temps ina gruppa, in pign chor, da cantadurs. Entuorn ils onns 1880 vegn numnadamein confirmau ch‘ ei deva in pign chor baselgia che cantava per occasiuns specialas. Franc ei che quella gruppa cumpigliava buca pli che vegn cantadurs, pertgei il plaz sin laupia lubeva buca in grond diember. Ins sa supponer ch‘ ils umens che mavan da gliez temps sin laupia figuravan el medem mument era sco cantadurs.
Il harmonium da 1905
1902 ei la baselgia vegnida renovada. Che la renovaziun era necessaria udin nus dil document sut. Che quella ha custau bia daners ei era enconuschent. Perquei survegnan ils da Segnas mo in harmonium da baselgia. Il prezi da quel munta a 380 frs.. Tgei ch‘ ei schabegiau cun l‘ orgla veglia ei buca enconuschent. Ualti carteivel era l‘ orgla da 1822 aschi en decadenza ch‘ ins ha insumma buca saviu duvrar ella pli, il harmonium ei pia staus pli che necessaris. Ils 26 da fevrer 1905 decida la radunonza da caplania da cumprar il sura numnau instrument. Quei relata il suandont protocoll[2]:
Prtogoll[3]
Sut il datum dals 26 de Fevrèr 1905 redunau vischins en casa de scola e tractau: Anflont ch‘ il baghiar la decretada orgla nova segi muort la defecta construcziun della baselgia ect. bucca de recomonder,
Concludiu
De cun il resultat import einorma de 11 frs. per fiuc, 8 frs. per melli e 2 frs. per olma carschentar la Parvenda, bein aber, ch‘ ei vegni dau ord quei 38‘ frs. per metter neu in harmonium de baselgia.
Segnas, ils 26 de Fevrè 1905
Jos. F. Flury[4]
L‘ orgla da 1933
Il harmonium ha surviu duront entgins onns. 1933 denton ein ins sedecidius da remplazzar el entras in‘ orgla nova dad in manual. Quei instrument ha custau 5050 frs. e duvrava quasi tut il plaz sin laupia sura aschia ch‘ ils cantadurs eran enserrai en diltuttafatg. Plinavon ha ella era cuvretg la finiastra che rendeva glisch sin laupia. Quei ha beinsavens provocau carplinas denter ils vischins. Aschia han els 1939 projectau in‘ engrondaziun dalla laupia, igl uestg denton leva saver nuot da quei[5].
L‘ orgla da 1964
Pér 1967 ei ina sligiaziun semussada. Ils 22 d‘ uost ha la firma Mathis da Näfels (GL) entschiet cun la projectaziun dall‘ orgla hodierna. ils cuosts ein alla finala seresultau sin varga 30‘000 francs. Ins astga ruasseivlamein menziunar che sur Gion Caminada ha rimnau quasi 30’000 francs per quell‘ orgla[6]. L‘ orgla sepresenta sco suonda[7]:
L‘ orgla posseda dus manuals ch‘ appartegnan mintgamai ad in positiv, pia dus positivs totalmein separai. Igl emprem manual ei per il positiv dorsal, il secund per il positiv toraxal. Mintga manual ha 51 tastas. Il pedal cumpeglia ferm duas octavas ed ha 27 tastas. La circumferenza dils manuals tonscha da C entochen d‘‘‘, quella dil pedal da C entochen d‘. L‘ orgla funcziuna cun ina tractura e registratura manuala. Ils 8 registers ein reparti sco suonda:
Positiv dorsal: Gedackt 8‘ 51 flautas da metal
Principal 4‘ 51 flautas da metal
Quinte 22/3‘ 39 flautas da metal
Mixtur 3 f. 2‘,1‘ 153 flautas da metal
Positiv toraxal: Spillpfeiffe 8‘ 51 flautas da metal[8]
Rohrflöte 4‘ 51 flautas da metal
Principal 2‘ 51 flautas da metal
Pedal: Subbass 16‘ 27 flautas da lenn
La collaudaziun era previda sin ils 17 da december 1967, l‘ inauguraziun sin la fiasta da Nadal 1967. Denton ha ei dau retards. Pli tard han ins fixau il datum sin ils 28 d‘ avrel 1968. Aschia ha la canzun ch‘ era vegnida cumponida per quei eveniment stuiu vegnir midada. Cunquei che la canzun ei vegnida fatga da dus vischins da Segnas e gest per quei intent unic, lessel buca tralaschar da nudar il text da quella. La melodia ei vegnida cumponida da Giusep Sialm †[9], il text ha Victor Durschei fatg. Aunc oz conta il Chor baselgia da Segnas questa canzun duront il temps da Nadal.
|
Nadal (versiun per ils 25 da december 1967)
Car Bambin, Fegl divin Spindrader, Salvader: Pasch e salit dai als carstgauns, Dai levgiament a nos malsauns, Glisch, salvament dai als pagauns.
Vegni sur cuolms e vals Per Jesus adurar. Culs aunghels celestials Lein gloria, laud cantar.
Nadal per pign e grond, Nadal per il puccont. Nadal, Nadal resun‘ il zenn dal con.
Selegra pievel: Il Segner ei nies retg. Siu cor schi niebel Ei nies albiert e tetg.
Laud al Salvader E gloria cantei al Spindrader. Fiasta Nadal Cloman ils zenns en choral: Retg celestial e perpeten.
|
Pastgas (versiun dils 28 d‘ avrel 1968)
Cristus ei ius a tschiel. Levada gloriusa. Retg celestial e retg mundial Has triumfau entiert e mort, A nus spindrau beada sort.
Cantei alleluja, Alleluja. Culs aunghels celestials Lein gloria, laud cantar.
Sogn Bab, sogn fegl, sogn Spért, Ti sontga Trinitad Nus adurein Tei En perpetnadad.
Selegra pievel: Il Segner ei nies retg. Siu cor schi niebel Ei nies albiert e tetg.
Laud al Salvader[10] E gloria cantei al Spindrader. Retg celestial Cloman ils zenns en choral: Retg celestial e perpeten.[11] |
Buca mo il chor baselgia ha preparau quei di da fiasta cun ina canzun. Da sur Gion Caminada, igl antecessur da sur Venzin, vein nus a Segnas aunc ses fegls da preparaziun per la benedicziun dall‘ orgla[12]. Quei eveniment, succedius all‘ entschatta dalla messa ha tunau aschia:
Spiritual: Nies agid ei enten Num dil Segner.
Pievel: Che ha fatg tschiel e tiara.
Spiritual: Ludei Niessegner en siu tempel
Ludei El el firmament de sia pussonza
Ludei El en sias ovras pussentas
Ludei El en sia grondezia infinita
Ludei El cun tun e trumbettas
Ludei El cun harfa e cetra
Ludei El cun pauca e saults
Ludei El cun gegias e flautas
Ludei El cun bransinas sonoras
Ludei El cun bransinas tunontas
Pievel: Tut tgi che ha flad duei il Segner ludar.
Spiritual: Ludei il Segner cun paucas e saults.
Pievel: Ludei el cun gegias e flautas.
Spiritual: Il Segner cun Vus
Pievel: E cun Tiu Spért.
Spiritual: Nus lein urar,
Segner, Ti has cumandau entras Tiu survient Moises de sunar las trumbettas tier ils sacrifecis che vegnan fatgs en Tiu num. Ti has voliu ch‘ ils fegls d‘ Israel laudien Tiu num cun tubas e bransinas. Nus rughein Tei: + benedescha quell‘ orgla ch‘ ei dedicada a Tiu sogn survetsch. Ed ils fideivels che laudan Tei cheu sin tiara cun canzuns spiritualas, lai arrivar tier la legria perpetna dil s. parvis. Entras Niessegner jesus Cristus Tiu Fegl, che viva e regia cun tei en unitad dil Spért Sogn, Dieus da perpeten en perpeten.
Pievel: Amen.[13]
Suenter quella benedicziun ha il pievel cantau il psalm 150. Sut la direcziun dad Albert Berther conta il chor la messa en honur da sogn Gion Battesta cumponida da Giusep Huonder ch‘ accumpogna il chor all‘ orgla. Sper el han ins era envidau igl organist Alexi Sialm.[14]
Per la renovaziun interna da 1992 ei planisau da midar l‘ orgla e postar quella encunter il mir davos, cunquei ch‘ ina laupia vegn demontada. La restauraziun dall’orgla hodierna ei succedida pér 2013. Per mitigar il tun recent ei vegniu fatg ina nova intonaziun ed il dispositiv lateral ei vegnius cumpletaus cun in niev register, ina Gmaba 8’. Quelals lavurs ein vegnidas fatgas dall’anteriura firma Freytag da Favugn.
[1] Victor e Teodosi Sialm, La famiglia Sialm, p. 76
[2] Urbari dalla pervenda Segnas, p. 265
[3] text original
[4] Urbari della pervenda Segnas 1859 – p.
[5] Invitaziun alla fiasta giubilara 50 onns Chor baselgia Segnas, p. 5
[6] Urbari dalla Caplania da Segnas, p. 294b
[7] tenor inventari cantunal entras Willi Lippuner 9-7-1969
[8] quellas flautas han ins priu dall‘ orgla veglia
[9] cumponiu a Cham, ils 7-11-1967
[10] tenor melodia da J. S. Bach
[11] Chor Baselgia Segnas
[12] Urbari dalla Caplania da Segnas, p. 294
[13] text original
[14] Archiv parochial Mustér