Glogn 19, p 40ss (Detgas e praulas propi da Medel)

Avon onns vegnev’ ei fatg vischnaunca pli savens ch’ ozildi. Ins tractava era damondas pli specialas, che mo quellas da vias, piogns, uauls e pastiras. — Ina ga hagi in da Muts priu ina talpa viva cun el e lu fatg valer sin vischnaunca, che quei seigi in animal infernal che sappi far nuot auter che «retscher manteuns tratsch». Quei seigi bien per nuot auter che per sfular faultschs. El fetschi la proposta da satrar viva la talpa; quei hagi ella meritau. Quei meini ha pigliau il pli e la talpa ei vegnida satrada viva, sco’l da Muts veva proponiu.

In’ autra gada ei in da Zunins vegnius cun in sprer viv sin vischnaunca. Quei lader da gaglinas seigi da truar alla mort, nibutscha ch’ ils cots hagien buca ditg lavur pli. Suenter haver disputau vi e neu ditg e liung, han ins concludiu da better el vivs sur la greppa giu. Ed aschia eis ei daventau. —

In onn da scartezia da fein han ins era giu endamen sin vischnaunca tgei pigliar a mauns en tala miseria. Far daischa? Far netgs? Co sestelegiar? La finfmala ha in da Tagiola proponiu che mintga pur tegni diesch vaccas ed in taur! E quei ha pigliau il pli. — Quei onn carschev’ei in techet pastg sin clutger. «Quel han ins betga vuliu schar lo. Per maglià giu quel han ins priu e ligiau ina seua ad in bov enturn culiez e tratg se el per scha maglià giu. Cur tg’el ei steus tratgs se tochen tiel pastg, catschav’el ora brav la liunga. Vesend quei, tut che greva: «Mirei tgei cueidas ch’el ha schon!» —

In’ autra ga eran ei puspei sin vischnaunca ed alla fin da quella ha in da Casiala manegiau la baselgia parochiala seigi vegnida baghegiada memia engiu; el fetschi la proposta — mach’ei seigien grad tuts ensemen — da dar in detg stausch ch’ella seruchegi empau plinensi! Detg e fatg! Ils valerus tilan ora ils tschops, tschentan quels in tschancun sur baselgia giun plaun, per mirar con la seruchegi. Duront ch’ei eran davos e stuschavan ha in dils pli mals priu naven ils tschops e fugius cuntut. Havend stuschau ina bun’ura va in si per mirar e cu’l ha buca viu ils tschops, grescha el siper tschels: «Te saperlot! Detga forza, ils tschops ein sutein!»