L‘ emprema uiara mundiala ha era schau anavos fastitgs legreivels. Biars giuvens che han prestau survetsch activ duront quels onns, per ordinari eran ei ils romontschs ensemen, han empriu da cantar. Tenor il text dall‘ invitaziun per la fiasta giubilara da 50 onns Chor Baselgia Segnas ei quei stau igl impuls per formar in chor el vitg da Segnas[1]. Ins ha clamau ils giuvens in di dil meins da november 1917 per discutar schebein ei fuss d‘ interess da fundar in chor baselgia quei ch‘ ei era succediu quella sera. Scolast Ludivic Huonder ei sepurschius da mussar da cantar. Heinrich Stiefenhofer e Gion Antoni Durschei han surpriu il tgamun dalla nova uniun. Beinspert han ins entschiet culs exercecis, all‘ entschatta cantavan ins canzuns profanas e pli tard era canzuns per en baselgia. L‘ emprema canzun ch‘ ei vegnida cantada ei stada „En in mulin leu sgara“. Tochen oz eis ei buca stau pusseivel dad eruir tgei canzun che quei ei cunquei ch‘ ella ei buca d‘ anflar en in cudisch da canzuns da quei temps ni avon ed era buca ella bibliografia dalla musica retoromontscha.

Beinspert han ins entschiet ad exercitar las messas.

L‘ emprema producziun ha il chor baselgia dau ina sera avon la fiasta dall‘ Immaculata ad Acletta. Suenter igl exerceci a Segnas seigien tuts se­rendi in davos l‘ auter, ei veva dau neiv e la via eri mo graschla, viers Acletta. Ei eri entuorn las diesch dalla sera. Plein forzan hagien ils cantadurs schau udir treis canzuns.

Ils da Segnas han udiu lur cantadurs per l‘ emprema gada da sogn Bistgaun. Suenter messa ha il chor cantau entginas canzuns e raccoltau in grond applaus. Duront il temps da tscheiver vegneva ei empriu da saltar suenter igl exer­ceci da cant. Cun ina suna da bucca vegneva ei fatg musica. Sco glisch du­vravan ins ina cazzola da nuegl.

Il Chor Baselgia da Segnas ha fatg part a diversas fiastas da cant nua ch‘ ils cantadurs han cuntonschiu il pli savens fetg buns resultats. Las davosas ga­das ein quei stau las fiastas da cant cecilianas a Rabius ed a Danis (1988 e 1990). Ils resultats da quellas duas fiastas ein stai excellents. Sche nus mirein anavos ella cronica vesein nus ch‘ ei ha era dau auters resultats da canifò, sco per exempel: 

Ils 27 da november 1921 vegnan las stautas dil Chor Baselgia da Segnas ac­ceptadas. Artechel 1 da quellas secloma: Sut datum dils 27 de november 1921 ei seconstituiu a Segnas in chor viril per promover il cant eclesiastic e profan[46].

In tschupi d‘ arbagias ha ei dau per il giuven chor baselgia a caschun dalla fiasta sursilvana da cant a Mustér, igl onn 1920. Ensemen cul chor viril da Mustér han els cantau la canzun da beinvegni. La canzun da premiaziun ei stada ina dallas empremas canzuns romontschas che Duri Sialm ha giu cumponiu.

1923 viseta il Chor Baselgia da Segnas la fiasta sursilvana da cant a Glion. Els vegnan honorai cun in tschupi d‘ arbagias. Il chor ha cantau la canzun „Siemis e flurs“ da C. Meister cun in text da Sep Mudest Nay.

Quei onn ei stau Creisma a Mustér. Cunquei ch‘ igl uestg Georgius Schmid de Grüneck veva aunc da cresmar a Sedrun ed il chor era gets pinaus per ir a fiasta da cant ein ils cantadurs semess sper via (giun Pignola, sin ina punt clavau) ed han cantau cura ch‘ igl uestg ei ius sperasvi. Lez hagi teniu la crotscha. Seigi ius vi tiel dirigent e priu la bitgetta ord maun. Cun sia vusch seigi el staus el cass da cuvierer gl‘ entir chor. Sch‘ il chor vessi giu cantau alla fiasta tenor igl uestg vessei quei franc dau silmeins dus tschupi­als da ruver![47] 

Ils 5 da schaner 1924 decidan ils commembers dil chor baselgia da prender part al til dalla fiasta centenara da 1924 a Trun nua ch‘ igl ei vegniu fe­stivau 500 onns Ligia Grischa. Medemamein fan els part al chor da val­lada che ha da cantar la messa festiva, la messa da sogn Placi e sogn Sigisbert da Georgius Schmid, e las canzuns tier il giug festiv cumponidas da Duri Sialm. 1927 viseta il Chor Baselgia da Segnas la fiasta sursilvana da cant a Glion. Els vegnan honorai cun in tschupi d‘ arbagias en secunda catego­ria.[48] 1930 pren il Chor Baselgia da Segnas part alla fiasta sursilvana da cant a Trun. Els vegnan honorai cun in tschupi d‘ arbagias en secunda cate­goria.[49] Igl onn 1933 Anflein nus il chor per l‘ emprema gda part ad ina fiasta ceciliana da cant ella Cadi, numnadamein a Mustér. Il success ei meins gronds.[50] 1939 separtecipescha il Chor Baselgia Segnas cun pulit bien suc­cess alla Fiasta ceciliana da Cant a Rabius.[51] 1949 viseta il Chor Baselgia da Segnas la fiasta sursilvana da cant a Glion. Els vegnan honorai cun in tschupi d‘ arbagias en emprema categoria.[52]1953 conta il Chor Baselgia da Segnas alla fiasta sursilvana da cant a Rabius. Els fan ils endischavels en emprema categoria.[53] Igl atun 1954 ei casa da scola nova stada finida. Per il di dall‘ inauguraziun ha il chor baselgia ensemen cun la giuventetgna ed ils affons cantau ina „cantata“ da Duri Sialm cun in tect dil dirigent dil chor, Victor Durschei. Quella cantata ei schizun vegnida registrada dil ra­dio dalla svizra tudestg e retoromontscha.[54] Ei setracta cheu dall‘ em­prema registraziun ch‘ ei vegnida fatga cul chor da Segnas.

Plinavon separtecipescha il chor 1954 cun bien success alla Fiasta ceciliana da Cant a Mustér.[55] 1959 anflein nus il Chor Baselgia Segnas cun fetg bien success alla Fiasta ceciliana da Cant a Trun. Il success a Danis 1963 ei staus fetg gronds, ils derschaders discuoran d‘ ina dallas meglieras pro­ducziuns!

 

[1] Invitaziun alla fiasta giubilara 50 onns Chor Baselgia Segnas, 1967 p. 1

[46] text original ord „Invitaziun alla fiasta giubilara 50 onns Chor Baselgia Segnas“, 1967 p. 3

[47] Invitaziun alla fiasta giubilara 50 onns Chor Baselgia Segnas, 1967 p. 8

[48] Invitaziun alla fiasta giubilara 50 onns Chor Baselgia Segnas, 1967 p. 8

[49] Invitaziun alla fiasta giubilara 50 onns Chor Baselgia Segnas, 1967 p. 8

[50] Invitaziun alla fiasta giubilara 50 onns Chor Baselgia Segnas, 1967 p. 8

[51] Invitaziun alla fiasta giubilara 50 onns Chor Baselgia Segnas, 1967 p. 8

[52] Invitaziun alla fiasta giubilara 50 onns Chor Baselgia Segnas, 1967 p. 8

[53] Invitaziun alla fiasta giubilara 50 onns Chor Baselgia Segnas, 1967 p. 8

[54] Invitaziun alla fiasta giubilara 50 onns Chor Baselgia Segnas, 1967 p. 10

[55] Invitaziun alla fiasta giubilara 50 onns Chor Baselgia Segnas, 1967 p. 6