da 1991 (G. Tenner)

Il vitget da Cuoz ei situaus encunter ost e schai sin in’altezia da 1251 meters sur mar. Il vitg ei partius en duas parts, numnadamein Cuoz-su e Cuoz-sut. A Cuoz-su, nua che la caplutta da sogn Giachen sesanfla, ei la veglia part dil vitg. Cuoz-sut exista sco fracziun per dapi ils onns 1980. Avon anflav‘ ins leu sulettamein dus clavaus. Ils davos onns ein aunc otg casas vegnidas vitier. Denter auter anflein nus era leu in hotel d‘ emprema classa, il hotel Montana. El ei la secunda ustria dil vischinadi da Segnas. A Cuoz-su vesein nus nov baghetgs. Da quels ein quater per habitar, duas casas novas e duas pli veglias dils onns 1827, ch’ein denton vegnidas renovadas ils davos onns.

Vulan ins vegnir a Cuoz cun in auto, ston ins bandunar la via principala avon che passar la punt sur il Rein da Segnas. Ins vegn lu a veser dus baghetgs, ina casa cun scrinaria ed in magasin da lenna. Igl ei quei la scrinaria e casa da Constantin Schnoz a.h., oz auda la scrinaria a siu fegl Oscar Schnoz. Cunquei che la casa veglia ei stada barschada giu, ei la casa che nus vesein oz buca aschi veglia. Il liug, nua che quels dus baghetgs sesanflan senumna Val. Suenter in caraun meina la via teissa directamein avon caplutta da sogn Giachen a Cuoz-su. Ina via nova naven dalla via principala meina gia suenter la tabla d‘ entschatta dil vitg Mustér el vest a Cuoz-sut.