La sondasera entuorn las 6 ha in gron fiug giud l’aulta planira de Breil mess en alarm la Surselva ed immediat ein ord tuttas vischnauncas dil contuorn ina massa umens cun pliras squetras serendi tiel liug de disgrazia, nua che 6 baghetgs, 3 casas e 3 clavaus, situai davard orientala dil vitg, denter ils 2 hotels, eran en flommas, ed entochen las 11 della notg gia consumai. Ord l’emprema casa ha saviu vegnir dustau pauc ne nuot.
Per motiv ch’ils umens de Breil sesanflavan quei di per part si prada (misès) e per part a marcau fuva l’entschatta pauc agid e dasperas munconza ded aua, essend ch’igl ual schai entuorn 400 meters naven dal liug d‘ incendi. Arrivadas, en relativ cuort temps, las squetras de Uors, Glion, Dardin, Schlans, Danis, Trun, Mustér, Rueun, Castrisch, Schluein e Sagogn han quellas intermediau ina l’autra la furniziun dell’aua sin quella distanza.
Per ventira fuv‘ ei negin suffel, quellacanun fuss il prighel staus fetg gronds, cunzun pil vischinont spess quatier sut baselgia. Sco in auda ei igl incendi vegnius caschunaus entras affons pigns schai anavos persuls en ina casa, ils quals hagien cun in tizun ardent mess fiug en clavau. Entras in vischin han quels aunc podiu vegnir liberai ad uras. Ei gliei de star mal per las familias tuccadas sco era ch’il grond e razional proiect dil vischinadi de Breil per in niev aquaduct cun hidrants fuva schi datier della realisaziun, mo ha aunc buca saviu esser survius per tal cas. Segirau fuva mo ina casa.
(ord Gasetta Romontscha dils 10 da zercladur 1903)
Clom d’agid.
Sco enconuschent ei ils 6 de Zercladur berschau giu a Breil 3 casas e 3 clavaus. Ord 2 casas ha quasi nuot saviu vegnir dustau ed eran quellas mo bass segiradas. La tiarza casa cun in clavau restniev era buca segirada. Il don ei in fetg considerabel ed ils donne-giai meriteivels de public sustiniment. Schege che la munificenza burgheisa ei tras las continuadas catastrofas de berschaments e las succedidas collectas vegnida messa ferm sin l’emprova, havein uus tuttina la speronza, che la carezia proximala vegni era puspei per nos donnegiai de fiug se manifestar. Nus lessen perquei tras quest clom d’agid haver supplicau nos compatriots e vischins d‘ era cheu levgiar tras ina pintga almosna la tresta sort de nos sventirai conburgheis. In comite d’agid, seconstituius il di suenter il berschament, pren cun engraziament a mauns era la pli pintga donaziun.
Breil, ils 30 de Zercladur 1903.
Il comite d’agid.