Glogn 5, p. 4ss (Enzacontas detgas e praulas ord la Val Medel)

Inagada er’ei in da Fuorns che fuss bugen maridaus. El enconuscheva treis soras gest tuttina bialas e saveva buca sedecider tgeinina prender. Cheu damonda quel sia mumma per plaid e cussegl e lezza di: „Envida en in di tuttas treis tier tei, lu metta sin meisa in magnuc caura dalla Puzzetta, epi fai adatg co scadina sestelegia da tagliar giu las buccadas.“

Il mat da Fuorns ha fatg sco la mumma veva detg; l’emprema maglia il magnuc cun crusta e tut; la secunda taglia giu la crusta, mo lai vid quella aunc bravamein magnuc; la tiarza sgara giu la crusta bein e sco s’auda, buca memia bia e buca memia pauc. Quei raquenta il mat lu alla mumma e quella di ad el: „Pren la tiarza per dunna!“ Quei ha el era suandau, ei maridaus e staus ventireivels sia entira veta, e sch’el ei buca morts, sche viv’el aunc oz.