Glogn 5, p. 4ss (Enzacontas detgas e praulas ord la Val Medel)

Dieus il Segner veva scaffiu tut ils animals dalla tiara ed elegiu ils lufs per ses tgauns; sulettamein la caura, igl animal principal da nossa Val Medel veva el emblidau. Quei ha il giavel observau ed ei vegnius en agid als da Medel cun scaffir cauras cun cuas liungas e finas. Cura che quellas mavan ora sin pastira per la spinatscha e draussa entuorn, sche capitav’ei savens, ch’ellas seplagavan e stevan pendidas cun lur lunghezia cuas ellas caglias; cheu veva il da cornas mintgaga breigias da snuar e far liber ellas. Quella lavur unfisescha il baubuzi ed el morda giu a finadina la cua, sco quei ch’ins vesa aunc oz ellas cun lur muzachet.

Naven dad ussa scheva il ner pascular las cauras persulas, mo cheu schabeg’ei, che Dieus il Segner sto ver viu co ellas maglian suro ils tschupials dalla pignola, scorsan ils bests e ruian naven las giuvnas plontinas dils ers. La crudeivla mort dalla giuvna vegetaziun dalla tiara encrescha al Segner e perquei tarmetta el ora ses tgauns, ils lufs, e lai scarpar las cauras. Sco ch’il belzabuob ha enderschiu quei, eis el cumparius avon il Segner e detg: „Tia creatira ha mazzau la mia!“ Il Segner ha respundiu: „Pertgei has ti scaffiu quella per donn dalla vegetaziun?“ Il giavel di: „Jeu hai stuiu far aschia: essend che miu senn ei nuscheivels sa quei ch’jeu scaffeschel buc esser d’in auter senn e natira e ti stos pagar las cauras. “Jeu paghel a ti il donn“, plaida il Segner, „aschi gleiti sco la feglia croda, ils daners ein gia dumbrai.“ Tard pigl atun vi, cura che tut la feglia era a tiara, cumpara il da cornas avon il Segner e pretenda il donn en daner blut. Mo il Segner di: „Ella baselgia da Constantinopel stat aunc in ruver che ha si tut la feglia.“ Grend e schmaledend svanescha il tenti per encurir il ruver, mo el sepiarda dapertut anavon entuorn duront 8 meins e cura ch’el ei puspei turnaus enta Medel eran las plontas tut verdas, plein feglia. Siu d’haver era aschia annulaus, mo dalla rabia ha el catschau ora ils egls a tut las cauras e mess en a quellas ses agens.

Perquei han oz tut las cauras egls giavel e cuas muzachettas ed el cumpara bugen en fuorma da caura denter la glieud.