Glogn 5, p. 4ss (Enzacontas detgas e praulas ord la Val Medel)

Inagada ei in dad Acla staus o Mustér e viu la furtga vid la quala ins pendeva da lezzas uras laders e morders. Turnaus enta Medel fa el l’autra dumengia la proposiziun sin vischnaunca d’era construir ina tala per la Val Medel. Ei ha pegliau il pli e quella ei vegnida derschida si. Buca ditg sisu capitesch’ei ch’ils da Medel pon tier in Talian ch’era ius ad engulond per tut la val entuorn. Cheu fa in da Curaglia la proposiziun da pender il schani, mo cheu encunter protesta il dad Ada cun ils plaids: “Fuss ina biala da pender quei stroli sin nossa furtga che nus vein baghiau per nus, nos affons e lur vegnensuenter.“