Glogn 5, p. 4ss (Enzacontas detgas e praulas ord la Val Medel)

In perveseder da Baselgia mava savens la sera a mattauns vi Pali tier ina gronda e biala matta persula. Essend ch’el veva gronda affecziun per ella, leva el maridar, mo la matta fageva buc’aunc quella prescha. Quei croda si al ménder da Baselgia ed el seresolva da laghegiar ora ina sera la muronza. Per quei intent va el bufatgamein entuorn casa e reiva sin finiastra dalla combra per spitgar leu silla biala. Vonzeivi vegn ella, metta ina scua enta letg, va giun cuschina, tila ina presa e svanescha da tgamin si. Da quei ha el sez stuiu sturnidar e dapi quei mument naven ha el buca pli giu queida da maridar.