Tenor la legenda ha in magnuc caschiel-tgaura decidiu davart il num digl uclaun. Ils habitonts vevan numnadamein da decider a tgei vischnaunca ch’els veglien appartener, a Mustér u a Tujetsch. Il meglier caschiel-tgaura dueva decider ed ils Tuatschins han gudignau. Ils avdonts han denton fatg in cumpromis, magliau caschiel tuatschin ed ein restai tier Mustér.

Mumpé vegn dil plaid latin mons che munta cuolm, crest (RN 2/I, 122) e Tujetsch deriva medemamein dil latin, numnadamein dil plai tubus che munta tgiern, bischel. Mumpé Tujetsch ei pia il cuolm avon il bischel, manegiau la Val Tujetsch. Quella declaraziun dat buca dispetas, persuenter la scripziun dil num:

Il Cussegl pign decida ils 12 da fenadur 1944 da midar il num Mompé Tavetsch en Mompé Tujetsch. Quella midada ei vegnida fatga en connex cun l’introducziun dalla nova carta topografica 1:50 000. Cun la constituziun communala da 1990 fixescha la vischnaunca per l‘emprema gada il num Mumpé Tujetsch sco versiun ufficiala. Schegie che la pronunzia ed il svilup dil lungatg laian udir in clar „u“ dat ei opposiziun. Igl october 1995 declara igl Uffeci per nomenclatura dil cantun Grischun definitivamein la versiun Mumpé Tujetsch sco ufficiala. Dapi lu vegn il num era duvraus aschia sin las cartas ed ella correspundenza (arch.com. Mustér).