annada 60, nr. 21 dils 25 da matg 1916

Ins vegn pér ussa tscheu e leu aunc pertscharts dellas catavegnas, che lavinas han fatg quest unviern els aults, en special en alps ed uauls. Ell’ alp cumina de Magriel a Mustér p. ex. ha ina lavina destruiu e scuau naven la tegia e devastau il bia uorden lient: aschia ei la caldera vegnid’anflada smaccada tut en plat sut la neiv e semegliontamein las brentas de latg; solet la centrifuga ha buca pitiu. Donns nunprevedi sin tuttas varts.