annada 60, nr. 24 dils 15 da zercladur 1916
La sepultura de nies Mgr. avat Benedetg ha ual giu liug, oz, gevia a miezdi, ed ei stada in viv mussament della gronda veneraziun da tuttas varts per il meriteivel, grond defunct prelat. La participaziun de pievel e clerus indigen, sco de spiritualesser e pievel jester e de dignitaris ecclesiastics e civils ei stada fetg gronda; la baselgia claustrala fuv’ emplenida giu bass, el chor e sin las laupias tochen sil davos plaz. Havend avat Benedetg sez giu giavischau de vegnir satraus sper ses confrars, eis el vegnius mess en fossa el senteri claustral avon porta baselgia, enstagl en baselgia sezza.
Suenter igl uffeci de morts en baselgia claustrala, nua ch’ igl ault defunct schischeva, circumdaus da flurs, en bara el chor, ha rev. Sgr. canc. episc. Dr. L. Vincenz teniu allas 10 1/2 giud scantschalla in stupent e commuentont riug funeral romontsch. El ha animau tuts de suondar il bien exempel dil car defunct e giavischau, che siu bien spért regi era pigl avegnir vinavon ella familia claustrala.
La suondonta messa pontificala de morts, accompignada d’ in solemn Requiem de quatter vuschs, ei vegnida celebrada da nies carezau cau diocesan ed amitg special dil defunct, Mgr. uestg Georgius, el medem temps ha Mgr. avat Fidelis de Stotzingen, avat-primas digl entir uorden de S. Benedetg, schiglioc residents a Roma, mo ussa, sco Tudestg, muort l’ uiara setratgs en Svizzera, celebrau ina messa bassa sin igl altar de S. Benedetg.
Las benedicziuns ed absoluziuns de bara han lu alternativamein dau: avat-primas Fid. de Stotzingen, celebrant, avatpraeses Thomas de Nossadunnaun, uestg Georgius, avat Baseli d’ Engelberg e domdecan Müller de S. Gagl. — ils avats de Muri-Gries e Mariastein-Briganza ein stai impedi de comparer muort uiara e malsogna. Enstagl ein ils paders rectors dils resp. collegis benedictins de Sarnen ed Altdorf e P. Placidus de Mariastein stai presents.
El suondont imposant til de bara tras la baselgia ed ora sin il pign senteri claustral sesanflavan, ultra dils gia allegai dignitaris, aunc in grond diember aults representants ecclesiastics e seculars, dals quals nus havein d. a. observau ils sequents: sco delegai offic. della regenza grischuna ils Sgrs. pres. guv. Vonmoos, Dr. Dedual e j Dr. Bossi; dapli Sgr. cus. d. cantuns ed adjutant general col. Dr. Brügger, en uniforma; il presid. actual dil corpus catolicum Sgr. pres. Casp. Willi de Domet; il President della partida conservativa grischuna Sgr. cus. naz. Dr. Steinhäuser; Sgr. cus. naz. Dr. Schmid sco ugau administr. claustral; la dertgira cirq. della Cadi, ina delegaziun dil magistrat d’ Ursera cun lur saltes en colurs e la suprastonza de Mustér; da part dil capetel catedral de Cuera ils rev. Sgrs. domdecan Laim e domcantor Cavelti; regens Dr. Gisler e mod. Dr. Tammo per il seminari de S. Leci; plinavon ils rev. canonis extraresidenz. Vieli, Beer, Derungs, Chistell; dalla missiun retica de P. caputschins il rev. P. Prefect Fidelis, cun ulteriurs confrars; da Dörnach il rev. decan giubilat Probst, al qual avat Benedetg ha aunc giu teniu il priedi festiv il Matg 5 vargau tier siu giubileum a Dörnach; sco delegau dal collegi de Sviz rev. Sgr. prof. Giger; da Basel rev. Sgr. plev. Käfer; da S. Murezi rev. Sgr. plev. Lanfranchi; da Turitg rev. Sgr. vic. Dr. Zanetti; dad Ursera il rev. P. plevon; da Baar il fabricant Meyenberg, grond benefactur della claustra; da Mustair era present Sgr. pres. Ruinatscha ed in nevs ed ina niaza de Mgr. avat Benedetg. Sut ils serius e commuentonts psalms rituals, sut tuchiez claustral e sut pietus suffragi dil grond pievel present ei la bara de nies meriteivel e nunemblideivel avat Benedetg vegnida sfundrada en fossa, accompignada da bia larmas d’ encreschadetgna, mo era da buna, stateivla memoria. El ruaussi en paisch!
Era l’emprema pagina dalla gasetta dedichescha igl entir frotispezi alla veta dil trapassau.