annada 60, nr. 21 dils 25 da matg 1916
Mistral Sep Ant. Monn in bein enconuschent um della Cadi ed en Surselva, ei spartius da questa veta la damaun dils 24 d. q. en ina vegliadetgna de 70 onns. Senza pli gronda cultivaziun de scola, la quala el ha giu frequentau en la claustra de Mustér ed ella scola cantonala, sedistingueva el gia en ses giuvens onns tras in solid, ruasseivel caracter ed ha spert acquistau la stema e confidonza de ses convischins.
Suenter esser passaus sur il scalem sco stathalter de vischnaunca eis el en quort vegnius elegius sco gerau en la suprastonza communala e lura savonzaus sco President de quella. En quei ufleci, grevs e spinus en ina schi gronda vischnaunca, ha mistral Monn surviu ils biars onns de sia veta, adina cun gronda premura, havend quitau per il fatgs de vischnaunca quasi pli che per ils agens. El dequors dils onns eis el era vegnius elegius repetidamein ella dertgira cirquitala e districtuala. Dapli ha el prestau fetg buns survetschs al cumin della Cadi sco derschader de paisch, el qual uffeci el ha, sez um della paisch, mess perina bia litigonts ed aschia spargnau bia malemperneivels process. Plinavon eis el staus biars onns, entochen sia mort, commember della commissiun pauperila e premurau directur della casa pauperila, sco successur de prof. Placi Condrau. Igl uffeci d’ in ugau baselgia della baselgia parochiala de S. Gion Battesta ha el procurau varga 30 onns e sco tal schau restaurar quei sanctuari e far grondas renovaziuns e reparaturas en quel. Donn ch’ il disgraziau zenn grond de S. Gions sa buca compignar cun siu tun solem-melanconic il defunct tier il ruaus della fossa. Quella malura cun il bi zenn ha sentelli era fatg al malsaun ugau baselgia greva dolur pér ils davos dis de sia veta.
Per engraziament de tuttas sias meriteivlas lavurs e prestaziuns per il beinstar general, ha il cumin della Cadi tschentau Sgr. gerau Monn, sut il qual num el era da vegl enneu enconuschents, il Matg 1907 sco mistral sin la buora dil curtin cumin, gia 60 onns vegls. Era sco tal ha el mess neu siu um e fatg tutta honur a sia plazza duront siu bieni. Ina secunda nomina sco mistral ha el, muort precara sanadat e vegliadetgna avanzada, buca acceptau pli igl onn 1909. — Ei dei aunc vegnir allegau, ch’ el seigi divers bienis staus numnaus sco deputau dil cussegl grond. Finalmein lein nus aunc far memoria de ses gronds merets sco ugau de bia orfens e vieuas, per ils quals el ha adina giu quitau sco in veritabel bab e teniu buns e gests quens.
Schege buca de ferma constituziun corporala ha Sgr. mistral Monn, tras solida regulara veta e tras igl oreifer quitau de duas soras, medemamein buca maridadas, aquistau ina respectabla vegliadetgna, che ha ual schau operar el schi bia dil bien. — Quei um della paisch e de sacrificontadat per il pievel de sia vischnaunca e della Cadi, quei um dil bien cussegl e della giustia, quei fideivel e bien amitg de reh e pauper, de stat e baselgia, possi ussa retscheiver la pagaglia per sia meriteivla veta terrestra. El ruaussi en paisch!