Gasetta Romontscha nr. 39 dils 23-9-1904
Las fieras digl atun han entschiet sut buns auspecis. La fiera d’ Andeer dals 20 d. q. ha giu numerus marcadonts, viv negozi e bials prezis. — Silla impurtonta fiera de Tusaun dals 21 d. q. ei stau catschau 3200 armauls e fuv’ei.sco adina compariu massa marcadonts. Per buns 4 tiers ei vegniu pagau aults prezis, presapauc sco onn d’atun, schege ch’in encorschevi ina certa pressiun. Schliata rauba fuva buca tschercada. Per fetg buns tiers ei vegniu pagau denter 30 e 40 marenghins. Mo entochen miezdi ei stau cargau 60 vagons de viafier cun marcanzia, ina gronda partida per l’Italla. — Silla fiera de Cuera dals 22 ei s stau catschau 320 armauls. Ils marcadonts gronds della bassa fuvan zvar vargai cun lur marcanzias de Tusaun, mo tonaton ei il negozi staus vivs per bials prezis sco onn d’atun.
Las fieras de Tavau e Closters dals 14 e 15 havevan muort la mal’aura giu pign esit; ils paucs marcadonts encurevan de dar suten, mo ils purs han teniu la dira. Buns armauls pagavan bein. — Sulla fiera d’Olivone dals 22 rapporta oz in telegramm: catschau varga 300 armauls, dals quals ca. la mesadat ein vegni vendi per aults prezis, en spezial bialas genetschas e grass bos. — La fiera ded Altstatten ded ier ha tenor in telegramm giu 708 tiers, daquei 267 armauls gronds, bia marcadonts e buns prezis.
Era il negozi culs stiarls, ch’ ils marcadonts grischuns han catschau sul Bernhardin, Lucmagn etc. mondi bein. Ils purs dell’Italla seigien vegni lunsch dal Tessin siado encunter allas marcanzias. La tscherca seigi schi viva, per motiv, ch’ils enorms, mai sudi prezis per biestga de maz hagien decimau stravagant ils armauls ell’ Italia e perquei regi scartezza de tiers. En medem sen scriva a nus in correspondent de Ligieun: ils prezis sillas fieras seigien en general aults; pummas e vin detti ei en abuldonza sco era auter fretg.
Bials prezis! Commandant Camenisch de Sarn ha vendiu a Zug ses 6 taurs premiai per total 9000 fr. Il pli vegl ha pagau 3000 fr., il pli giuven 1000 fr., mo ei quel in’ ura pli tard schon vegnius vendius per 2000 fr.