Gasetta Romontscha nr. 26 dils 23-6-1904

Ad Andiast ei il venderdis-sera, ils 17 d. q., in affon de 10 onns, fegl dil scrinari Fidel Schmed de Mustér, daus sur in piogn giu el Smuér e negaus. In um giuven, che fuva demaneivel, ha cun agen prighel de veta empruau de liberar il pauper affon, mo quel ei beinghleiti daus a funds e svanius senza fastitg ellas furiusas undas dil pussent flum alpin. Umens ded Andiast, Pignu e Ruaun, provedi cun sugas, lattas e frissachens, han encuretg la bara la sonda naven dil liug della sventira entochen tiella sboccada dil Smuér el Rein en ina lungbezia de ca. 7 kilometers, mo anflau nuot. La dumengia ban 30 umens ded Andiast ed auters de Ruaun e Pignu puspei encuretg la bara cun gronds strapazs e prighel de veta — ein ge plirs stai ell’ aua tochen sut bratsch ed auters, che mo il tgau vargava siado — mo puspei adumbatten. Entochen ussa ei gl’affon buca vegnius anflaus. Dieus vegli remunerar quels umens per lur sacrificonta ovra de misericordia e consolar ils combrigiai geniturs e fargliuns digl affon disgraziau.