annada 60, nr. 39 dils 28 da settember 1916

Ils turists Künzler e Christen ein serendi en compagnia d’ in tierz sin il Schneehorn. Suenter quei tur ein ils dus emprems sesparti dal tierz per persuls aunc traversar dal vest il Tödi. La traversada ei reussida. Sin il glatscher Biferten ei denton la descensiun vegnida impedida empau. Il stgir della notg ha surpriu ils dus turists, aschia che quels han stoviu passentar la notg sin il glatscher. L’autra damaun han els continuau lur viadi encunter la tegia clubista de Grünhorn. Entuorn las 11 a. m. ei Christen anetgamein curdaus en ina sfendaglia dil glatscher, 5 meters afuns. Künzler ha ditg empruau de portar agid a siu compogn sventirau, il qual deva sin sur ad el e possedeva aunc la preschientscha de spért. Finalmein eis el serendius viers la Sandalp per encurir agid; tier la tegia clubista de Fridolin, pli vischina, ha el numnadamein buca giu anflau la via muort la spessa brentina. Dalla val della Linth ei sin sia nova ina colonna d’ agid de 7 umens arrivada allas 7 d. s. ella tegia de Fridolin. En consequenza della tschaghera de brentina e stgiradetgna ha la colonna buca saviu encurir il disgraziau quella sera.

L’ autra damaun allas 4 ein ils umens della colonna semess sin via ed ein allas 7 arrivai el liug de disgrazia. Duront duas uras han els stoviu sgarsar naven pli ch’ in meter neiv nova sur las sfandaglias per encurir il disgraziau. Mo adumbatten. Il glatscher ha buca returnau sia preda lagutida. La colonna ha stoviu returnar senza haver anflau il turist Christen, ne vivs ne morts.