En pia Memoria major Franz de Vincenz

annada 46, nr. 4 dils 23 da schaner 1902

Ils 17 d. q. ha la vischnaunca de Mustér, sut sucurs de numerus amitgs ed enconoschents ord autras vischnauncas, compignau tier il ruaus della fossa siu beinenconoschent conburgeis Sgr. major Franz de Vincenz naschius ils 14 de November 1837. II defunct ei, artont il saun e spirt militeric de siu bab, Sgr. colonell Baltassar de Vincenz, che fuva cun gronda destincziun staus 42 onns en survetsch militeric spagnol, medemamein sededicaus en ses giuvens onns al da gliez temps flurent survetsch jester militeric e serendius gia da 20 onns en survetsch roman sut papa Pius IX. En tal survetsch ha il giuven grond e bi guerier fatg atras enteifer 3 onns ils enconoschents critics temps dil stat papal ed era priu part 1859 dalla bloccada dil marcau de Perugia entras la truppa papala, dals quals temps il defunct raquintava aunc savens cun fiuc ed ardiment. Turnaus cun pensiun en sia patria ha el continuau sia cariera militera en quella, nua che el ei savanzaus entochen tier major. 1872 ha el cun caschun dils manevers svizzers menau, en plazza de siu commondant colonell Risch, sco aide-major il battagliun Nr. 22 atras s. Gagl, leu, nua ch’ el ha il davos temps, pia 30 onns suenter, adumbatten encuretg levgiament da sia liunga malsogna dil cor e nua ch’ el ei era resignadamein spartius la sera dils 14 d. q.

A sia vischnaunca ed al cumin ha Sgr. maior Frz. de Vincenz prestau ses survetschs sco President communal, commember della commissiun tutelara e deputau, sco era sco premurau, bien cantadur en baselgia e pil cant profan. Perquei ha il chor viril de Mustér era priu il davos commiau da siu fideivel, vegl commember cun ina commuentonte canzun romontscha sin sia fossa, ornond quella cun in tschupi de condolenza. En favur de caussas pias ha il defunct testamentau considerabels legats, ch’ il Segner vegli remunerar. Personalmein sedestingueva Sgr. maior Vincenz tras particulara curtesia e familiaritat ed en spezial entras in nundestruibel bien humor entochen en ses vegls dis, che figievan adina beinvesius el en scadina societat. Ussa ruaussa pia en paisch, bien Amitg, e speronza ch’ ei fuvi preparau per Tei in plaz denter il chor angelic entuorn il I tron de nies Bab celestial!

Duri Sialm cun 10 onns

annada 45, nr. 32 dils 8 d’ uost 1901

Ina rara remarcabladat ellas montognas ei in giuven virtuos de 10 onns cun num Duri S . . el vischinadi de S.. a Mustér, che suna gia cun gronda habilitat e facilitat clavier ed orgla. Instruius gia cun 6 onns da siu bab, in autodididact ella musica, el sunar clavier, gauda ussa quei giuvenet dapli in onn fundamentala instrucziun d’ in oreifer organist e pianist (P. Leo), accompogn’ el gia cul orgla en siu vischinadi messas choralas e figuralas tier il survetsch divin e suna sil clavier cun virtuositat sonatas de Bethoven. Siu capabel instructer ha grondas speronzas silla svilupaziun musicala de quei buobet.

Malsogna misteriusa a Mutschengia

annada 45, nr. 14 dils 14 d’avrel 1901

A Mutschnengia, ina fracziun de Medel, ei rutt ora ils 17 de Mars en in muvel d’ in auter pur la medema nonenconoschenta malsogna sco 1896 e ha enteifer 15 dis raffau naven 7 dals 11 armauls; 1896 il Fevrèr havev’ ella devastau en curt temps tuts 7 armauls d’ in pur; 1896/97 ha ella aunc custau 12—13 singuls armauls mobein dal temps, che quels mavan ad jarva.

La malsogna, ch’ ei exteriuramein gnanc tgunsch de enconoscher, quozza mintgamai tier in armaul sil pli 3 dis e va lu quel nunspitgadamein d’ ina daguota. Las secziuns fatgas dal veterinari cantonal e districtual vid plirs cadavers han mussau tier tuts il medem stabil maletg tipic ed il medem decurs della malsogna, enzennas el venter ed el tgau de tussegaziun dil saun — tras in tissi nonenconoschent. Quei tissi sa vegnir constataus mo sin via chemicala, segi che quel sesanfli el fein, ell’ aua, el tratsch de Mutschnengia, ch’ ei tut sin schiefer, ne etc. etc.- ‘Per tal intent han ins schon 1896 giu termess agl institut Chemical cantonal ed agl institut patalogic a Turitg las allegadas materias ed era particlas infectadas dils cadavers per schar intercurir, mo l’ annalisa ha lu giu in resultat negativ. In plaida p. ex. era da tissis de fein, ch’ in supona che sappien darivar de certas rugadas ne purginas, ne sch’ il fein setuorni buc en uorden, mo era quels tissis ein aunc buca enconoschents e defini. Remarcabels ein ils cas a Mutschnengia ord motiv, che la malsogna tucca mintgamai mo il muvel ded in possessur, schegie che las condiziuns, sco fein, aua, tratsch etc. ein, sch’ in voless e sto bunamein encurir leu la raschun, tonaton per tuts muvels de quei liug ualti las medemas.

— Contagiusa para la malsogna denton per ventira buca d’ esser e sa aschia era buca daventar prigulusa per il gieneral, mo tonaton setractesch’ei cheu d’ina malsogna vehementa e maligna, che meretta tutta attenziun e precauziun. Speronza vegn ei cul temps era a reussir d’ enflar ora la caschun de quella. Per cletg ha la vischnaunca de Medel era l’ assicuranza de biestga, che gida il singul privat, mo talas schleppras cueschan ins era buca allas societats.

 

annada 46, nr. 11 dils 13 da mars 1902

La nunexplicabla malsogna, che ha onn d’ unviern raffau naven ad in pur a Mutschnengia-Medel in suenterlauter 8 dad 11 armauls, ei quels dis deplorablamein puspei semussada tiel muvel dil medem proprietari, culs medems simptons ed ha gia custau 2 armauls gronds ed attacau ulteriurs. II veterinari cantonal e districtual han giu sedau tutta pusseivla bregia per diagnosticar quella malsogna, mo senza segir success. In enquera las raschuns ellas relaziuns geologicas dil terren dil resp. pavel. En tals cas fuss ei segiramein dueivel, ch’ il cantun ne la confederaziun stessan neu cun in extraordinari agid.

Migliuraziun dil raz da nuorsas a Tujetsch

annada 45, nr. 13 dils 28 da mars 1901

La vischnaunca de Tuietseh ha per ammeglieraziun de sia razza de nuorsas concludiu d’ importar sin permavera 35 bials anugls ed in quantum nuorsas ord il Val La razza de nuorsas vallisianas — il bia alvas, cun extremitats neras e corns — sequalifichescha, sco nus havein aunc giu relatau pli ella gasetta, fetg bein per nossas relaziuns alpinas. Emprovas p. ex. a Mustér dapli 15 onns han giu oreifer success. Quellas nuorsas fan gieneralmein 40—60 funds carn, bia launa, ein fetg fritgei- vlas, stedias sill’jarva, spertas e lingieras e meins spuretgas. Onz pli ruha ei lur launa e las nuorsas neras ein raras e scartas, mo tras cruschar cun nossa razza s’ uliveschan era quellas qualitats pli u meins ora. Il pli commodeivel sans ins cumprar quellas nuorsas el Valleis sillas grondas fieras de nuorsas dil Settember a Zermatt. La megliera razza dei sesanflar el Visperthal e sil Simplon.

1 13 14 15