ord Gasetta Romontscha dils 5 da fevrer 1925

Per il di de s. Plaisch ha sgr. scolast Michel Maissen de Quoz-Mustér saviu celebrar cun sia consorta sias nozzas d’ aur. Il giubilar che ha avon 3 onns absolviu siu siatontavel onn de scolast, ha la ventira de celebrar quella rara fiasta en ina vescladad corporala e spirtala tut aparti. El stat oz ella vegliadetgna patriarcala de 92 1/2 onn. Avon 50 onns eis el passaus per la secunda ga, suenter la mort de sia emprema dunna, tier igl altar ed ha cun ses 42 onns ch’ el veva, bein strusch cartiu de saver celebrar inaga las nozzas d‘ aur. Rev. P. Placi Tenner, aunc adina en buna memoria a Mustér, che ha benediu sia ligia culla spusa Maria Rosa Martina Simonet, che veva 22 onns, para d‘ haver serrau il ligiom matrimonial cun specials latschs, che perfin la mort ha tema de rumper, — In bi ed edificont mument, cu il veneran vegliurd e sia fidelvla consorta ein stai en schenuglias ella baselgietta de Quoz per retscheiver leu la benedicziun tschentada en dalla s. Baselgia gest per las nozzas d‘ aur, per tedlar la s. Messa, retscheiver Niessegner communablamein e sepinar per las nozzas — buca las d’ argien e buca las ded aur, gnanc las de diamant — na, per las nozzas che quozzan senza fin leusi en tschiel in di. 

Sur can. G. A. Brugger ha gratulau al giubilar sco plevon de Mustér e cau dil cus. de scola, rev. Sur camerari B. Cathomen ha engraziau ad el per ils buns survetschs rendi ed il sustegn ch’el ei staus duront ils 17 onns che els han luvrau ensemen a s. Gions, l‘ in sco plevon e 1’ auter culla bitgetta en scola pintga, mo era en baselgia, 

en processiuns e sin gassa, — bunamein empauet in viceplevon. Rev. Sur Fry ha sco scolar dil giubilar dau al pèr giubilar en baselgia la benedicziun per las nozzas ded aur e gratulau ad el, enamiez la numerusa familia, radunada da miezdi entuorn il carezau bab, en num de tuts ses anteriurs scolars. Vegli il Segner dar al meritau giubilar ina biala sera sontga ed in di menar el ventireivels tier las nozzas celestialas!