(ord Gasetta Romontscha dils 2 da mars 1899)

A Segnas-Mustér ei da mesanotg dils 25 sils 26 de Fevrèr barschau giu totalmein la casa-mulin de Giachen Muoth. Per ventira ei tala casa situada entuorn 30 pass videifer il vitg giu ella val sper l‘ aua, e regiev’ ei negin suffel, cas contrari fuss gl’ entir vitg de Segnas staus en gron prigel, malgrad la neiv sils tètgs. La casa fuva segirada, buc aber il mobiliar, dal qual in ha saviu liberar pauc ne nuot. Ils 4 avdonts, da quels ina femna malsauna ed in affon pign, tuts da quei temps a ruaus, han malamein podiu mitschar culla veta. Il hidrant de Segnas ha prestau bien survetsch. La spreza de Mustér cun in gron diember umens ei, essend igl incendi immediat staus advertius dal niev „wacht-polizist“ de Mustér, en curt temps stada a Segnas, tratga si da 4 cavalls tut a samada. Il benefeci d’ in wacht de notg, e de bien uorden de fiug en ina vischnaunca semuossa mintgainai tier incendis, mo arvan deplorablamein il bia pér las sventiras ils égls per tals buns cundrezs.