La mesiamnasera, 5 minutas avon las 4 han ins sentiu el vitg Mustér in ferm tiarratriembel, ch‘ ei vegnius sentius da tut tgi che sesanflava en casas, cunzun en alzadas pliaultas. Curt in sin lauter ei succediu dus ferms stauschs ella direcziun de SidOst encunter NordWest. In haveva il sentiment, ch‘ in vegni ballontschaus en quella direcziun vi e neu, las casas stremblevan, las preits de casas lenn tgiulavan e tras ils bagetgs mava ina ramur. Las amplas vid fildiroms el chor della baselgia claustrala — ei fuva leu ual viaspras — han entschiet a ballontschar fermamein videneu e giud igl arviul ei sedestacau en plirs logens la liadira. Ellas duas casas de scola ein ils scolars segli si dalla tema ed en ina stanza ein ésch e fenestras, buca bein serrai, sesaviarts.

Il tiaratriembel ha siu origin u el dar ensemen de cavorgias egl intern della tiara, ne ell‘ explosiun de vapur, sche ei vegn auas ella massa fuida de fiug, che sesanfla el ravugl della tiara. Ch‘ ei sesanfla fiug ella tiara muossan ils quolms, che spidan si tal, ils schinumnai vulcans.

(ord Gasetta Romontscha dils 31 d’october 1901)