(ord Gasetta Romontscha dils 2 d’avrel 1903)
Era il vitg Mustér ha anflau il necessari diember abonnents per petizionar per il telefon, quella schi commodeivla invenziun, culla quala in sa plidar bein ed entelgenteivel p. ex. naven da Mustér cun enzitgi a Basel, Genevra, Turitg etc., pia sin fetg grondas distanzas.

(ord Gasetta Romontscha dils 30 da fenadur 1903)
Presentamein vegn ei luvrau vid l’installaziun dil telefon per Mustér. La lingia ei avanzada entochen Rabius e vegn prevedentamein ad esser finida e duvreivla en 15 dis.

(ord Gasetta Romontscha dils 3 da settember 1903)
Sonda vargada ei l’installaziun dil telefon per Mustér stada finida e la lingia vegnida surdada al trafic. Ina nunparegliabla commodeivladat de saver plidar bein ed entelgenteivlamein cun persunas sin distanzas de tschiens chilometers! Cun Cuera, Turitg,

s. Gagl, Luzern etc. sa vegnir plidau schi clar, ch‘ in enconuscha il plidont vid la vusch. Il bien ei, ch‘ in sa, sch‘ ei dat dispetta per telefon, buc aunc seglir in l’auter els cavegls tral teleton. En 100 onns ei denton fors‘ era quei inventau!

Havent ils raschienis de Mustér denton de passar mintgamai 3 staziuns centralas (Mustér, Glion e Rehanau) mo tochen Cuera, pitescha savens la speditivadat giudlunder e fuss ei perquei per Glion e Mustér giavischeivel, che la staziun Rehanau vegness dismessa sco centrala per la Surselva e tratg ina nova lingia telefonica da leu a Cuera. In seuneschi e fetschi la damonda.