Ina gronda disgrazia ei succedida ils 26 de Zercladur sil péz Blas. Ina classa dil gimnasi superiur de Turitg, 16 scolars e 2 professers, Dr. Gröbli e Dr. Vodoz, dus versai clubists, ein ils 25 arrivai sul Kreuzlipass a Sedrun, stai leu sur notg ella Cruna ed igl auter di serendi atras la val Nalps per ir sur il péz Blas ella val Curnera e da leu a Tschamutt.

La colonna haveva priu in giuven de Tuietsch sco purtader. Muort la biara neiv nova ed ils strapazs dil stunclenteivel marsch ha la societat denton stoviu midar plan e concludiu de traversar la spunda dil péz Blas per arrivar a Curnera, parent quella via meins prigulusa.

Mo anflont prof. Gröbli, che mava ordavon, era quei territori prigulus de lavinas e difficultus de passar, ha el fatg returnar la societat. Sut il péz Blas ei quella sefermada in mument sin in pastget terrein sur in grepp de 100 m. altezia, fertont che prof. Gröbli fuva sil precint ded ir a mirar, schebein ins vegnessi giu ella val Cadlim.

Tuts sesevan giu sil pastget deno 6 scolars, che stevan sin peis pign tschancun pli ad ault e d’ina vard. Cheu cloma prof. Gröbli: adatg! ed enaquella vegn ina lavina e scua naven dil pastget tuts 12 sul precipeci giu, deno 1 scolar (Kintscherf), che ha cul fest aune podiu seretener osum quel; dals 6 scolars sisu ei mo 1, Moser, vegnius purtaus dalla lavina in pign toc. Kintscherf ei seruschnaus sul grepp giu tiel liug de disgrazia, nua che 2 fuvan gia puspei en pei. Quels han lu, sez blessai, gedau a liberar ils auters blessai ord la lavina, mo lu anflau prof. Gröbli ed il scolar Hofman morts. Quei fuva entuorn l’ina de miezdi. Kintscherf ei curius a Cadagno per agid e spert giu 10 umens e suenter a Piora, danunder ch’ina autra colonna d’agid cun in miedi ei arrivada. Casualmein fuva era in miedi de Basel leu. Dals 5 scolars ch‘ ein restai intacts ein 4, probabel da tema ed anguoscha e muort ulteriur prighel de lavina, turnai a Sedrun, termettent encunter ils pasturs de Nalps a Moser ed a l’auter scolar schaus anavos cun quel e che fuvan era gia sin via a Sedrun. Il purtader de Tuietsch ei, medemamen blessaus, turnaus persuls a casa.

Denton ha la glieut d’agid gedau a rabitschar ils blessai a Piora ed entochen mesanotg ein tuts stai leu sut tètg, mo sin via a Piora ei aunc in tierz, il scolar Odermatt, morts en con-

sequenza dellas blessuras ed a Turitg el spital dus dis suenter aunc in quart, il scolar Liebman. Sut grondius conduct de bara ein las 4 unfrendas vegnidas satradas a Turitg.

Prof. Gröbli fuva 50 onns vegls e lai anavos in affon de 2 onns ed in bab d‘ 80 onns, ils 3 scolars dumbravan denter 18—20 onns e fuva in il figl d’in pauper mistergnèr. Prof.

Vodoz ed in auter scolar ein aunc el spital malsauns, mo han ins buna speronza sin megliurament. Veramein trest!

(ord Gasetta Romontscha dils 2 da fenadur 1903)