Dacurt han ils frars Wenzin de s. Roc e 8. Grions a Medel sin l’usitada gagliarda maniera de seschar sulla greppa giu en sugas, priu ell’ alp Cristallina ord in igniv 2 tschés (Steinadler – aquila fulva), in giuvon e la veglia ed in ief de quella. La veglia, in majestus bi exemplar, ei vegnida mo cun ina greffla ella falla tendida ed en talla vegnida tratga siado. Igl igniv a miez in’aulta preit grep sesanflavan denter ina massa oss’ en aunc ils frestgs cadavers d’ ina muntanialla, d’ in tschut e d’ina gaglina salvadia. In vesa ord quei tgei don quels tiers de rappina fan. Ei gliei quei la veglia della familia de tschés, che ha schon onns ora fatg gasterias cullas nuorsas de I’ alp Cristallina. Presentamein sesanflan quels dus gasts en segira fermonza el park dil Disentiserhof en compagnia cun 2 auters tschés prii ils onns antecedents ord gl’igniv della madema familia. Ils temps ein semidai: ussa tillan ins ils tschés, per strofiar els, dalla greppa si e betta buca els sulla greppa giu. Respect dals valerus giuvens, mo deigien tallas criticas lavurs adina vegnir menadas ora cun adatg e precauziun.

(Gasetta Romontscha dils 5-7-1894, nr. 27)