Igl 1 d. q. ei vegniu satrau a Mustér il renomau vegl calschadur Peter Tener de Funs en ina vegliadetgna de 82 onns. Quel ha sitau 3 uors a „maun fri, biebein 800 camutschs, 400—500 muntanialas, 5 tschés grons, 12 fiergnas doradas (Goldmarder), ina massa uolps, lieurs, taiss, cozs e gaglinas salvadias, pernischs ed urlauns etc. El sitava lochen 30 camutschs per stad; sil per Muraun ha el in onn sitau 5 camutschs en in di, sil madem plaz ed el valsen de mo 3 minutas, nua ch’ ei era 7 camutschs ensemen ed ei restau mo 2. Sil pez Alpetta ha el fatg giu 4 bucs (camutschs) en in di e 3 de quels sil madem plaz. Plirasga ha ei schabiau, ch‘ el ha sitau 2 camutschs mo cun in „schutz.“ Aschia ei bucca de sesmervigliar, ch’el raschunava en ses vegls dis, schi bia de sias catschas. Quei tut ha el schau anavos en scret e zvar sco el scriva „bucca per segloriar, sonder per attribuir quei suletamein al maun de Diu e per quella fin sai jeu far nuot auter che clomar si cul psalmist: Segner, tgei dei jeu render a Ti per ton bien, che Ti has fatg a mi! Jeu laschel a tuts per recommendau en lur pia memoria, segi jeu vivs ne morts.“

(Gasetta Romontscha dils 13-6-1889, nr. 24)