(Correspondenza americana.) Ei figess a nus in gron plischer, sche la Gasetta Romonscha admoness ils Romonschs el Grischun de bein ponderar avon che sedecider de serender ell’ America. Ei para, che bia emigrants hagien nagina idea, co ei passa e repassa de tschei maun della mar. Biars arrivan tscheu cun vanas ideas, cunzun el schliet temps ded ussa. Glieut giuvna, ferma e frestga, anflan onz fadigia, schebein che nus havein tscheu de quels en abundonza.

II pli deplorabel eis ei, ch‘ ei vegn neuadèn ella America de quels schanis, ch’ ein leuora nuot valeta e san sin neginas modas gudognar lur paun. Cun tals subiects va ei tscheu fetg mal. Avon 15 dis havein nus Romonschs stoviu sepassar si resolutamein e spedir in tal anavos ell’ Europa sin quen de sia vischnaunca nativa, che veva termess el ell’ America per fierer a dies ad autra glieut. In dei mo bucca tertgar, ch’ in sappi duvrar ell’ America de tutta sort glieut, na quei ei buc il cas. Duess ei er’ esser in ch’ ha fatg atras bunas scolas e tratga de duvrar tscheu nagin agit, sche secugliuna el malamein, cunzun sch’ el ha buc empau de luvrar. El sto tscheu semetter en e far lavurs gropas e ruhas. Il di ded oz ei tscheu nuot meglier che ella veglia Grischa; vul in ir suenter sia clomada e professiun, sche stat el leu ora meglier che tscheu. Nus Grischuns  romonschs, che sesanflein tscheu, vessen gron plischer, sch’ Els mettessen quei ella Gasetta, sinaquei che in suondass il vegl ed experimentau proverbi che di: stai a casa e setilla via undreivlamein. Cun quei serius avis lein nus haver salidau cordialmein nos vegls compatriots ella cara Grischa ed agurau ad els in bien niev onn.Aschia scriva in emigrant sursilvan ord il stat Wisconsin.

(Gasetta Romontscha dils 10 da schaner 1889, nr. 2)