Domengia vergada, entuorn las 9 della sera ha annetgamein gl‘ alarm de fiuc destadau ils vischins de Sedrun ord il sien. Ina casa len cun in clavau confinont, enamiez numerus auters baghetgs, stevan en aultas flom mas, ord las qualas ils dus habitonts de quella casa, in um vegl ed ina fumitgasa, ch‘ eran mademamein schon a ruaus, han podiu vegnir clomai tras il grir e clomar ded ina vischina. Al spert sucuors dils vischins e lur energica lavur eis ei reussiu de tener concentrau il fiuc mo sin quels dus baghetgs, schege ch‘ il fiuc seresava continuadamein ora sur plirs baghetgs vischinonts, casas e clavaus plein fretg. Ord la casa intschendrada han ins podiu liberar suletamein empau caschiel ord tschalè, fertont ch‘ in ei ella furia vegnius memia tard sil patratg de liberar las 12 cauras ord nuegl, las qualas in ha lu enflau leu stenschidas; tut auter ei lu consumau dallas flommas, senz‘ esser segirau. Sur igl origin dil fiuc han ins negins segirs indecis; in suppona che quel segi ruts ora el tgamin.
Tier quella caschun ei a Sedrun par‘ ei era vegniu experimentau la calamitat, la quala in vegness probabel aunc ad experimentar en bein enqual auter liuc della Surselva en in cas de berschament, numnadamein, che las sprezzas e rors erien buc en bien uorden e che la glieut ei bucca instruida egl aranschament de quellas pil moment decisiv, ascbia che las sprezzas ein p. e. el vertent cas stadas pér en 2 uras en acziun, muort munconza d‘ exerceci ed enconaschienscha. In saluteivel avis de empruar beinduras las sprezzas e s’ exercitar el tractament de quellas.
(Gasetta Romontscha dils 6-9-1888)
Cun plischer prendein nus si la rectificaziun della correspondenza el davos numer sugl incendi a Sedrun, la quala darivava zvar era dad in aspectatur de quel, che la sprezza segi schon en ina buna mes‘ ura e bucca pér en 2 uras stada en acziun, e ch’ ils umens giuvens, che ein schiglioc plitost versai el survetsch della sprezza, erien naturalmein absents el militer. — Nus selubin cun quella caschun aunc ina remarca per mauns della ludeivla vischnaunca de Tujetsch, tonpli che nus essen tier quei cas, da vischins de Tujetsch sez, vegni insinuai, de prender l‘ iniziativa tier la recommendaziun a quella vischnaunca, d’ ereger in telegraf ne telefon cun Mustér, che vegness en scadin cas bucca mo a portar in desiderau levgiament dil comers cun quella vischnaunca, mobein che fuss ual en cas de berschaments ge de grondissim néz per recurir da vischnauncas vischinontas savens fetg necessari immediat agit.
(Gasetta Romontscha dils 13-9-1888)