Gasetta Romontscha nr. 21 dils 19-5-1904

Il quors de pompiers a Mustér, pil district Reinanteriur entscheiva, sco la regenza lai publicar, Gliendisdis Tschuncheiswas, ils 23 d. q. allas 4 suenter miezdi. Ils instructers per tal quors levien buca ded obtener avon e buca pli tard. Scadina vischnaunca duessi termetter silmeins 8 delegai tier il quors, il qual vegn a cuzzar entochen sonda sera. Quost e logis per ils participonts ei procurau e paga il cantun. (Event, sclariment dat la suprastonza de Mustér, alla quala ins vegli era ton pli spert notificar il diember dils delegai.)

Muort l’impurtonza della caussa recommondein nus allas vischnauncas de separticipar stedi da tal quors de pompiers. Era delegai ord auters districts san separticipar. Red.

Gasetta Romontscha nr. 22 dils 26-5-1904

Entras il present quors de pompiers vesa Mustér ora quest’ jamna sco ina pintga garnischun. Fertont che las 25 scolaras dil quors per lavurs manilas lavuran sco aviuls tut tgeuamein en casa de scola, exerciteschan ils 37 pompiers ord las differentas vischnauncas dil district Reinanteriur en tenuta e sut disciplina militera dalla damaun entochen sera stediamein el liber cun sprezzas, scalas e hydrants e fan veseivels progress sut l’ energica, capavla direcziun de bgr. G. Brugger de Cuera e ses instructers auxiliars Sgr. Ant. Heini de Razén e Sgr. A. Mathis de Cuera. Tuts participonts muossan ludeivla premura e vegn quei quors speronza a purtar buns fretgs ella Cadi pigl uorden de fiug, tonpli che schizun commembers della dertgira cirquitala e districtuala separticipeschan de quel. Sonda sera siara il quors cun in’ inspecziun. 

Gasetta Romontscha nr. 23 dils 2-6-1904

Il quors de pompiers a Mustér ei vegnius serraus sonda sera suenter in’inspecziun entras il delegau pres. Castelberg de Glion. Il davos exerceci de seglir e fierer or da fenestra umens e buobs en ina solida, lada teila stendida ha provocau buca pauc spass. En siu fulminont plaid final ha Sgr. instructer Brugger exprimiu la cuntentientscha culla premura e las prestaziuns dils participonts e la speronza, ch’ els anflien ellas vischnauncas buna suatientscha e bien success. En num dil cumin e dils participonts ha Sgr. derschader G. A. Deplazes engraziau als instructers per lur breigia e stenta, che vegni speronza purtar buns fretgs. Fiat!