Ord la Gasetta Romontscha dils 13 da fevrer 1919:

Ils 9/10 d. q. ha, tenor rapports generals, il Fevrer puspei mussau inaga ils dents cun ferdaglias de 15—35°C., tenor situaziun ed altezia dils differente loghens. A Mustér mussav’ il thermometer p. ex. -18 °, a Medel -20, a Sedrun -23, Glion e sil Säntis -24, a S. Murezi -30, Spligia -35 °. Ils pass tgiulavan il glendisdis sin via sco sche tut havess aunc en calzers de domengias; mo las pli grondas catavegnas ha la ferdaglia caschunau tscheu e leu vid aquaducts en ed ord casa e — vid las plunas lenna de pegna. L’ aura ei denton puspei spert setemprada.