annada 60, nr. 31 dils 3 d’ uost 1916

Domengia , ils 6 d’ Uost fa nies enconuschent chor viril sursilvan „Ligia Grischa“ in’ excursiun a Mustér e ha cun caschun de tala viseta la buontat de portar avon allas 3 s. m. el parc (paviglion) dil „Disentiserhof“ public e libramein in diember canzuns romontschas e tudestgas. Nus dubitein buca, che las producziuns de quei valent chor vegnien ad haver cheu gronda attracziun udend ils biars quel per l’ empremaga e che amitgs ed amitgas d’ in bi cant beneventeschien engrazieivlamein e cun legherment ils stimai gasts e cantadurs ord las differentas vischnauncas de nossa Surselva. La „Ligia Grischa“ arriva la domengia cun il tren dellas 12.10 a miezdi a Mustér. Ella stat presentamein sut presidi de Sgr. pres. cirq. Caderas de Schnaus e sut direcziun de Sgr. scolast real Nold a Glion. In cordial beinvegni a nossa brava „Ligia Grischa“!

 

annada 60, nr. 31 dils 3 d’ uost 1916

La „Ligia grischa“ a Mustér. Domengia vargada ha nossa „Ligia grischa“, sco stau annunziau, dau l’ honur de sia viseta alla capitala della Cadi e preparau cheu ad in grond publicum cun sias oreifras producziuns de cant in beinvegniu e delicius deletg musical. Dals ca. 70 commembers della „Ligia grischa“, serecrutonts ord tuttas parts della Surseiva, da Cuera tochen Mustér, che serimnan denton pli completamein mo tier combats de concurrenza tier pli grondas fiastas de cant e per cunzun representar leu il cant e lungatg romontsch, ein ca. 35 arrivai a Mustér cun il tren dellas 12.10 e vegni retscharts cheu curteseivlamein d’ amitgs ed enconuschents e scadin cun in matget de steil’ alva e flurs alpinas ord mauns de giuvnettas. Tier l’idea della „Ligia grischa“ a Mustér e da schi stupent’ aura emprema viseta udev’ ad ella in bi matg alpin.

Suenter ina quort’ emprova communabla en sala de scola, ornada cun flurs per il beinvegni, e suenter in pign paus, ha il concert priu allas 3 s. m. si’ entschatta el magnific parc dil „Disentiserhof“, sper il vast paviglion, in veritabel „Sängerhain“, che fuva circumdaus da massa merveglius ed attents auditurs ed audituras: dals ca. 100 curants jasters dil Disentiserhof, da bia gleut de Mustér e contuorn e da schuldada tudestga.

Cun l’ imposanta canzun patriotica  „Eidgenossen Gott zum Gruss!“ da Angerer, ha la „Ligia Grischa“ intonau ed inaugurau sut direcziun de Sgr. scolast real Nold sias producziuns ed era accordau cun quels vigurus e majestus accords ils cors dils auditurs sil dretg tun patriotic. Cun pintgas interrupziuns ha lu il chor dilectau igl auditori duront datier de duas uras cun in grond diember canzuns, baul romontschas, baul tudestgas e mintgamai raccoltau niev e meritau applaus. Dallas ulteriuras canzuns tudestgas alleghein nus: „Turmwarts Minne“ da Decker; „Die letzte Wacht“ e „Dort liegt die Heimat mir am Rhein“ da Attenhofer; „Bittgesang für ’s Vaterland“, cun accompognament de clavier, da Sturm; e dallas romontschas: „Geri de Frundsberg“ da Dr. Schmid d. Gr.; „Il Svizzer egl jester“ da Gaugier;  „Alla patria grischuna“ da Stehle;  „La patria dil Grischun“ da Vogt;  „II pur suveran“ da Erni — diregida dal componist, Sgr. red. e pres. Erni de Trin sez —; „Primavera“ da Köllner; „Miu Grischun“ da Wunderlin. Las 3 davosas canzuns ein vegnidas cantadas d’ in dubel quartett della „Ligia grischa“. — A miez il concert ha lu er’ aunc niev valent musicus Sgr. Duri Sialm de Segnas seschau commuentar d’ allegrar auditurs e cantadurs cun ina de sias meisterilas producziuns sin il clavier.

Encunter la fin dellas producziuns ha in vegl e stimau curant dil „Disentiserhof“, Sgr. direct. de banca Henrici de Basel, priu il plaid a miez la gronda raspada, per remetter alla „Ligia grischa“ en num dils presents in cordial engraziament per las bialas gratuitas producziuns, e lu adhortau igl auditori de cun quella caschun seregordar della presenta collecta en nossa patria en favur de schuldada svizzera, vegnida malsauna ne en munglaments duront il survetsch militar. Ses bials plaids, accompignai dall’ allegada canzun „Rogaziun per la patria“ han giu bien effect ed immediat rimnau 250 fr. libras unfrendas per tal intent. — Che las gulas dils cantadurs schegien buc en da strapaz e calira ha Sgr. hotelier Tuor dil Disentiserhof generusamein giu quitau e dasperas aunc schau ornar quels cun odorusas rosas ord ses bials curtins. — 

II concert della „Ligia grischa“ ei staus en tuts graus bein reussius e ha raccoltau grond applaus ed ‘engrazieivla renconuscbientscha.

Suenter las producziuns han ils amitgs de Mustér compignau lur gasts sin ina quorta spazziada a Fontanivas, tier il bi lag niev amiez il majestus parc natural de leu, ornaus el dequors della stad cun plirs plischeivels edifecis de lenn tras la schuldada tudestga a Mustér. In pign refrestg offerius cheu als gasts ed in plaid d’ engraziament da part dil President communal per la emperneivla viseta a Mustér han exprimiu la simpatia e renconuschientscha a nossa „Ligia grischa“. Il President de quella ha era da sia vart remess in cordial engraziament per la curteseivla accoglenza. Duront la canzun „Vineta“ ed autras navigavan consortas dils gasts ella biala barca per il spazius lag entuorn, tut incantadas giud l’ emprema nav ella Partsura sin in lag aunc nunenconuschents ella geografia e sin las cartas grischunas, malgrad sia lunghezia de 100 e sia ladezia de 25 meters e considerabla profunditat.

Returnai el vitg han ils cantadurs aunc schau resunar in’ uretta en hilaria reuniun egl umbrivaun curtin dil „Central“ amiez il liug in diember canzuns, beneventadas era dalla schuldada tudestga cun in trippel „hurra!“, ed allas 7.47 ei la „Ligia Grischa“ vegnida compignada silla gara tier in cordial comiau suenter I’ aschi biala ed emperneivla viseta. Aunc „Frestgamein nus alzein“ ed il tren ha sut engrazieivels salids puspei menau a casa ils cantadurs romontschs sursilvans. La viseta della „Ligia Grischa“ dils 6 d’ Uost 1916 a Mustér vegn aunc a restar cheu ditg en buna memoria e quella memoria speronza prest puspei refrestgentada tras ina nova viseta. Vivat floreat „Ligia Grischa!“