annada 60, nr. 27 dils 6 da fenadur 1916

II bi fegl illustrau jamnil „Die Schweizer Familie“, che compara ell’ officina d‘ Ed. Schäubli a Turitg, porta en siu davos Numer 35 digl 1 de Fenadur denter auter era il beingartiau maletg de Sgr. scolast-giubilar Mih. Ant. Meissen de Mustér-Cuoz, cun entgins datums ord sia veta e sur siu operar. Ei vegn cheu gestamein indicau, che Sgr. Meissen seigi bein il pli vegl scolast che detti aunc scola en Svizzera, pia il senior de tuts ses collegas. Sgr. scolast Meissen ei, malgrad ses 85 onns, aunc sauns e viscals, ha teniu nuninterruttamein 65 onns scola a Mustér e dat aunc ussa adina la „scola pintga“ allas 2 classas inferiuras dil vitg cun buca meins che 70 scolars. Siu giubileum de 25, 50 e 60 onns sco scolast ei mintgamai vegnius festivaus honorificamein a Mustér. Dasperas ei Sgr. Meissen era aunc staus duront 44 onns forester de revier per Mustér ne contuorn, che ha bein era, cun il bien moviment e la sanadeivl’ aria egl uaul, gidau a mantener sia buna sanadat. Agurein aunc vinavon medema sanadat e bien operar al meriteivel, stimau Veteran e „bab dils pigns“!