annada 60, nr. 27 dils 6 da fenadur 1916

 

Gratulaziun alla ven. claustra de Mustér
per la benedicziun dll nlev elegiu Avat Sia grazia reverendissima Bonifaci Duwe.

Tgi vegn en claustra a pontificar
E prender en maun la canna d’ Avat?
Tgi ha sin sogn Placi la grazia de star
Sco ault sacerdot sigl altar en ornat? —
Il Segner, che muossa pertut siu quitau,
Ha per igl uffeci igl um preparau.

Ei tuna ord claustra: Nus vein in avat,
Il sogn Sigisbert ha in niev successur!
En quort vegn neutier la solemnitat,
Che po benedir nies superiur.
En plazza de Diu el mein’ il Convent,
La prompt’ obedientscha ei nies legherment.

En vitgs e valladas ei vegn palesau:
Ils Paders han fatg inà bun’ elecziun.
La glisch giu da sura ha buca muncau,
Il tschiel agli detti la benedicziun!
O bial’ abbazia, a ti gratulein,
E niev Monsignur, nus Tei salidein!

De misericordia la mumma eis Ti
Maria, undrada els aults de Mustér;
Al cau Bonifaci mett’ en igl ani,
Ch’ el possi pils frars far bein siu duer,
Sco Tiu Benedetg, ch’ ha Tei carezau
E Tiu sanctuari da niev baghegiau! Fl. C.

 

Nies niev avat de Mustér

Mgr. Bonifaci Duwe.

II medem zenn della tuor claustrala, che ha dolorusamein annunziau sil di de s. Antoni, ils 13 de Zercl., la biala e beada mort de nies nunemblideivel Avat Benedetg p. m., ha il mardis vargau, il di della translaziun de s. Martin, ils 4 de Fen. allas 10 a. m. annunziau e proclamau legreivlamein la nomina d’ in niev successur de s. Sigisbert, d’ in niev avat ella liunga colonna dils avats della ven. claustra de Mustér, la legreivla e consoleivia elecziun dil capitular Bonifaci Duwe sco 81-iavel avat.

La elecziun ha muort las relaziuns postalas, las qualas impedeschan muort l’ uiara la communicaziun cun Roma, schau spetgar empau pli ditg. Denton han ils conventuals sco era il pievel giu in bien e sanadeivel temps duront quella sedisvacanza, de rogar la divina Providientscha per in bien success de quei venerabel act electoral e d’ ornar sin il pign senteri claustral la fossa dil defunct Avat Benedetg cun engrazieivlas oraziuns, de plantar flurs significontas entuorn la frestga fossa, d’ ornar la crusch nera cun in tschupi dellas pli bialas flurs alpinas, ruttas e messas ensemen da quei medem maun, che ha fatg ils plans dil Sanctuari della Mumma della misericordia e gidau il defunct Avat Benedetg enten baghiar quei tempel. Aschia va ei: tristezia e consolaziun, Requiems e Tedeums sentaupan, avats spartan ed avats arrivan, ils quolms stattan, cunzun ils quolms perpetens de Quel, che regia e meina tut.

Aschia ei il quart di dil Fenadur 1916 puspei in di de benedicziun e consolaziun per la ven. abbazia de Mustér e bein era per la Cadi, per il cantun dils Grischs e per aschi lunsch sco l’ influenza culturala e spirituala della casa de s. Placi e Sigisbert tonscha.

La sera avon il di d’ elecziun ei Mgr. Avat Thomas de Nossadunnaun, prätses della congregaziun benedictina svizzera, arrivaus a Mustér cun il notari apost. P. Nicolaus della medema claustra, sco era cun dus rev. Paders caputschins, P Giusep de Danis e P. Urban de Cumbel, che han, per mussament dellas veglias bunas relaziuns denter ils dus uordens religius e tenor vegl usit, giu la missiun e carezia de funczionar sco perdetgas digl act d‘ elecziun.

La damaun dils 4 ha il pietus pievel de Mustér cuninaga sentiu, ch‘ il di porti zatgei extraordinari. Ils vegn Paders capitulars han buca celebrau la s. meesa, tuts han retschiert la s. communiun duront la 8. messa dil rev. Mgr. prases e quei ord il medem calisch, en il qual ils capitulars duevan tier l’ elecziun deponer ils zedels de votaziun. Ins vesa, ch‘ ina elecziun abbaziala vegn considerada per ina sontga ed impurtonta caussa, era per ina fatschenta, sur la quala la sontgissima Voluntat divina ha de vigilar. Buca per nuot ha la s. Baselgia circumdau ina tala elecziun cun seriusas ceremonias, cun proclamaziuns, interrogaziuns, cun serraments e smanatschai castitgs. Aschia era tier quella elecziun. Perquei spetgavan biars dil pievel il resultat gia suenter in quort intervall e supponevan liungs scrutinis, nua ch’ ei setractava aunc dellas preparaziuns per igl act electoral sez.

Denton eis ei ju relativamein spert vinavon e gia entuorn las diesch ha il notari apost., accompignaus dallas duas perdetgas, proclamau giud scantschalla il resultat ed il zenn grond ha clamau vivamein giuedora: Ussa ha la claustra puspei in bab ed avat!

Denton ha il niev elegiu avat, suenter haver dau siu consentiment alla voluntat ed elecziun de ses Confrars, retschiert ord il maun dil prases gratulont igl ani abbazial, per mussament, che la ven. claustra, vieua dapi ils 13 dil meins vargau, seigi e resti ussa sia sontga spusa. Cun quei simbol dil s. spusalezi e vestgius cun rocchett e mozett (mantilla), mo aunc senza crusch veseivla — la nunveseivla crusch sentev‘ il niev elegiu avat bein gia tier siu plaid de consentiment —, accompignaus dagl entir convent e menaus dal präses, ha avat Bonifaci fatg siu emprem sogn viadi ord il convent, tras la baselgia de Nossadunna, nua che la buna Mumma della misericordia ha bein dau in‘ egliada materna ed ina benedicziun abuldonta al successur de quel, che ha baghegiau igl emprem sanctuari el stgir uaul igl onn 614 ed al successur direct de quel, che ha finiu il niev tempel de Nossadunna la stad 1899. Il muentont til della consolada familia claustrala ei entraus ella baselgia de s. Martin, en preschientscha de bia gleut, sut il tuchiez e las giubilontas melodias dell‘ orgla, ei sefermaus avon igl altar grond, nua ch‘ il niev bab ed avat ha embratschau e bitschau tuts ses conventuals, ils quals han lura, frestgamein susteni dallas vuschs dils students, cantau sin l‘ orgla il Tedeum e retschiert la benedicziun pontificala dil rev. Mgr. Avat Thomas e cun quella ed en quella bein era la paterna, tgeua e cordiala benedicziun de quei, che duei domengia proxima dar per l’ emprema gada la benedicziun solemna alla claustra, al pievel, alla tiara e bein era alla fossa de siu antecessur. Il defunct Avat Benedetg ei staus de Mustair, il niev Avat Bonifaci ei arrivaus da Mustair ed ei ussa il niev e carezau avat de Mustér, ad multos annos! —

II niev avat ei oriunds da Meschede en Westfalia, naschius ils 7 de Schaner 1859. Bein menaus els giuvens onns dalla Providientscha, eis el sco emprendist arrivaus a Cuera, nua ch’ il bien decan cat. Modest Tuor p. m. ha diregiu il bien scrinari Heinrich Duwe en l‘ uniun de mistergners a Cuera per surdar el alla ven. claustra de Mustér, resp. alla scola claustrala, nua ch‘ el ha stoviu entscheiver ses studis cun pli giuvens students, nus numnein sco camerads de classa il defunct rev. Dr. Sep Huonder, P. Duri Sialm, Dr. St. Berther. Ses studis ha el continuau a Sarnen e finiu cun la maturitat a Sviz. Sin quei eis el returnaus tier siu car Mustér sco noviz, tier siu bab avat Benedetg, tier ses anteriurs instructers; el ei restaus burgheis tudestg, essend ch‘ ei era suenter 1883 tenor regiement cantonal, buca necessari pli d’ esser burgheis svizzer per vegnir commember della claustra. Avon 22 onns ha el fatg profess solemn (l.VII. 1894) ed el medem onn, ils 30 de Sett., celebrau sia messa nuviala. Siu operar ha el tenor obedientscha dedicau per 4 onns alla scola ed als frars laics, per 14 onns allas ven. muniessas benedictinas a Mustair, sco spiritual ed econom.

Tut quei fideivel operar vegn ussa domengia proxima encoronau cun la benedicziun abbaziala. Pia, la domengia avon 8. Placi, las 9¹/4 entscheiva quella biala e commuentonta festivitat en la gronda baselgia della ven. claustra, en preschientscha digl avat primas Fidelis de Stotzingen. Sco consecrator funczionescha Mgr. avat Thomas de Nossadunnaun, sco assistent Mgr. avat Basili d’ Engelberg e sia Grazia rev. probst cathr. Dr. Gudegn Willi de Cuera. Probabel arriva era Mgr. avat Augustin de Mariestein. L’ uiara impedescha in viadi digl avat de Gries-Tirol.

Biars seregordan aunc della benedicziun dil defunct Avat Benedetg, ils 22 d’Avrel 1888. Lura fuv’ei 11 paders e 5 frars, quellaga eis ei 20 paders ed 11 frars laics, schege ch‘ igl aunghel della mort ha menau ord nies miez el davos quort temps il carezau bab Benedetg ed ils cars confrars P. Gregori, Br. Benedetg e Br. Raphael. Il convent ei semultiplicaus e novs confrars vegnan ad arrivar per gidar ils paders e frars della carezada claustra, els tegnan gia il fest de viadi entamaun e la buna Mumma della misericordia ha bein quitau per siu sanctuari! Oravontut vegli quella Mumma d’in perpeten agid gidar il niev avat Bonifaci, sinaquei ch’ el possi complenir sia sontga e greva clamada per siu agen salit, per la prosperaziun della ven. claustra e de tuts quels che vivan ell’ umbriva della fundaziun de S. Placi e Sigisbert.

Ina compatriota dil niev avat de Mustér, la gronda poeta Annette de Droste Hülshoff, ha inaga cantau ils significonts plaids, che ina soletta benedicziun vali pli bia che dieschmelli crunas. Ina tala liunga e reha benedicziun agurein nus da cor, en num della claustra, en num della Cadi e dell‘ entira patria, era en num della patria westfalica, a sia Grazia reverendissima,
— Mgr. avat Bonifaci. —
Vegli S. Bonifaci, siu sogn patrun, unir sia pussenta intercessiun cun nos cordiala auguris e nossas ferventas orazinns! — Ad multos annos!