Nuorsas survivan igl unviern en Curnera

annada 60, nr 2 dils 17 da fevrer 1916

Ell’alp Cavradi Curnera, Tujetsch, ei quels dis aunc vegniu anflau a miez la neiv 5 nuorsas, che havevan pari passentau entochen dacheu ’gl unviern oraviert en quels aults. Ils tiers sesanflavan giu bass sper l‘ aua ed en lur stavel sblutau era ruis si tratsch ed jarva. Quater umens han portau las nuorsas, che fuvan ora sils trentin, duas uras lunsch encunter Selva. D’ ina sisavla nuorsa, unfrenda della liunga e criua prischunia han ins anflau el liug mo entginas restanzas d’ ossa e launa. Ils tiers han aunc buca patrun.

Trest accident a Tschamutt

annada 46, nr. 50 dils 11 da december 1902

In trest schabetg ei dacuort succedius a Tschamutt. Ina robusta dunna de 45 onns, mumma de familia, fuva serendida endadens il vitg ella spunda dretga dil Rein per rimnar draussa de berschar. Turnont cul buordi dalla provisorica starschogna dil Rein neu, nua che menadiras fuvan il di avon segiramein passadas suravi, ei il glatsch sfundraus culla paupra dunna ed ei quella par’ei vegnida sut la peisa dil grev buordi en e restada morta. Niessegner consoleschi la combrigiada familia!

Arver igl Alpsu

annada 46, nr. 22 dils 28 da matg 1902

Sco ina depescha ha relatau a nus jer ha il cussegl grond sin proposiziun fatga denter auter era concludiu de commissionar nossa regenza de voler effectuar tier il cussegl federal e tier la regenza uranèsa, che da 1903 naven vegni l‘ Alpsu mintgamai aviarta cugl 1 Juni. Lein sperar, che quei davos sforz effectueschi, suenter ch‘ in ei gia dapli onns enneu annualmein, mo adumbatten seviults tier quellas duas autoritats cun rela- tivas supplicas privatas, officialas e diplomaticas. Dal maun grischun ein ins actualmein vid la lavur ded arver e fuss quella finida sigl 1 Juni, mo da vard uranèsa ei aunc buca fiers ora ina soletta palla neiv, aschia che ils Uranès vegnan ils 2 de Juni puspei a stover mazzar atras cufflaus e lavinas la massa cavalls de tscheins, che van quei di naven dela fiera de Trun sur culm.

Nevada da Pastgas

annada 46, nr. 14 dils 3 d’avrel 1902

Pastgas sin pégna! Pastgas e gliendis- dispastgas ha ei dau giu in grond quantum neiv; en Tujetsch han ins miserau, culla vedra l 1/2 Gliendisdis de miezdi all’ina ei a Rueras, da vegl enneu pereclitau da lavinas, mo ussa biars onns staus schurmiaus, vegniu giu ina terribla lavina de caul, ch’ ha podiu surpassar la ferma ustonza de mir ed ei sefermada pign tschancun sul stradun el vitg. Ella ha devastau 3 clavaus, denter quels in bagetg niev de 18. Admoni dal constant prigel fan ils resp. proprietaris mintgamai diever de quels bagetgs gia ’gl atun cun lur muvels. Tonaton ei era ju alla malura in quantum fein, ch’ ils purs vegnan ussa, sche 1’ aura mida aunc buc, malamein a sa-ver duvrar.

Migliuraziun dil raz da nuorsas a Tujetsch

annada 45, nr. 13 dils 28 da mars 1901

La vischnaunca de Tuietseh ha per ammeglieraziun de sia razza de nuorsas concludiu d’ importar sin permavera 35 bials anugls ed in quantum nuorsas ord il Val La razza de nuorsas vallisianas — il bia alvas, cun extremitats neras e corns — sequalifichescha, sco nus havein aunc giu relatau pli ella gasetta, fetg bein per nossas relaziuns alpinas. Emprovas p. ex. a Mustér dapli 15 onns han giu oreifer success. Quellas nuorsas fan gieneralmein 40—60 funds carn, bia launa, ein fetg fritgei- vlas, stedias sill’jarva, spertas e lingieras e meins spuretgas. Onz pli ruha ei lur launa e las nuorsas neras ein raras e scartas, mo tras cruschar cun nossa razza s’ uliveschan era quellas qualitats pli u meins ora. Il pli commodeivel sans ins cumprar quellas nuorsas el Valleis sillas grondas fieras de nuorsas dil Settember a Zermatt. La megliera razza dei sesanflar el Visperthal e sil Simplon.

1 2