ord Gasetta Romontscha nr. 7 dils 13 da fevrer 2013
— Ski Club Mustér. (Comm.) Ils 7 ed 8 de Fevrer [1913] han siat commembers dil Ski Club Mustér fatg il proiectau tur de skis tier la hetta clubista de Medel, il glatscher de Lavaz, traversau la planira della Greina, Pass Diesrut Vrin. L’ emprema mesadat dil tur era enconuschenta dagl onn vergau enneu, denton eran uonn las relaziuns de neiv mendras, essend la neiv schelada della secunda part ha cunzun la traversa della Greina cuntentau fetg ils participonts, essend leu la neiv smulusa. L’ entira contrada porscha dagl ault dil glatscher de Lavaz anora in aspect grondius, che mo quel sa preziar che ha viu in tal temps d’ unviern. Essend las relaziuns de neiv quei di bunas e segiras han ins saviu ascender dalla teissa plaunca sut il Péz Summuot si ed aschia spertamein arrivar sigl ault dil Diesrut, beneventai d’ in ferm fagugn.
Da leu han ins aunc saviu schluittar in toc della Val Diesrut giu, mo la gloria ei gleiti stada finida, havend il fagugn teniu bein casa e sgartau naven la neiv, schend anavos mo enqual cuflau. — Spert ils skis si dies ed a pei dalla val o — ei stau la parola — pertgei ils vischinonts quolms scurlavan il tgau ed il vegl Piz Terri, majestus sco el ei, fugava, sco Geta Trina il mender di digl onn. Arrivai a Puzatsch ein ils skis puspei vegni en acziun ed en circa 5 minutas era igl uclaun St. Giusep acquistaus. In bien vischin de Lumnezia ha retschiert ils emprems surventschiders della Greina duront temps unviern cul meglier ed adequat salid — ruogs empleni cun savurus latg bugliu. Cordial engraziament.
Da leu anora spertamein a Vrin — arrivai punct las treis — in quort repass e spertamein vinavon, essend la distanza aunc liunga. Nus schluittein dalla biala Lumnezia ora, mintgaton prendend in refrestg tier in bien amitg — beinduras entupond enconuschents, che salidan sin la fiasta a Lumbrein. — Arrivai a Vella van nos skis en prescha engiuviars e mond sper Porclas ora havein nus giu il sentiment sco d’in salid ord temps stemprai. Arrivai a Glion circa allas 7 han ins aunc schau passar ina quorta revista il passau tur ed il finale ei stau: „In grondius e bi tur, il qual sa vegnir cussegliaus a buns e versai skiturs.“ — Eviva, aunc in bien sit Veltliner e lu resuna il clom: Einsteigen nach Disentis.