annada 45, nr. 34 dils 22 d’ uost 1901
Ei era la legreivla fiasta de Nossadunna d’ Uost, nua che roschada glieut ord las vischnauncas de Mustér, Tuietsch e Sumvitg pelegrinavan malgrad l’ aura dubiusa sil romantic stradun dil Lucmagn della val Medel en tier la quarta messa nuviala, celebrada leu enteifer ils davos 5 onns. Curaglia paradava en vestgiu festiv. Dapertut sgolatschavan bandieras e loschs artgs triumfals sesalzavan leu avon baselgia, avon casa digl aultrev. Sgr. primiziant Paulin Giger, il Beniamin della numerusa familia dil beinenconoschent Sgr. marcadont Gion Librat Giger, e sulla sboccada della via vicinala el stradun. Quels ed auters ornaments devan viva perdetga dell’ activitat e premura della giuventetgna medelensa per embellir il di dil Segner.
Sut il solemn tuchiez dils zens e repetidas salvias de murtès, che rebattevan dal Muraun toeben tier il Scopi, ei empau suenter las 9 il til festiv semess en moviment tier la baselgia parochiala a Platta: ordavon la compaginia de mats en parada militera e cun sia musica instrumentala alla testa, ina biala rietscha giuvnas cun tschupi e schos alv, il Sgr. primiziant culla familia spirituala, ses gieniturs, fargliuns, parents ed amitgs cun ina massa glieut sco suita. Pilver in pitoresc til per ina intressanta fotografia! Sut il beindecorau artg triumfal a Platta ei il primiziant vegnius retscharts dagl aultrev. Sgr. cammerer Simeon culs funcziononts diacons e ministrants e tras ina decorada alea artificiala menaus ella baselgia parochiala, fulenada en cun glieut.
Il festiv survetsch divin ha priu sia entschatta cun in commensurau priedi dil Sgr. plevon. Suenter haver exprimiu sia cordiala legria d’ oz saver menar tier igl altar quei primiziant, ch’ el hagi battiau e preparau tier l’ emprema communiun, ha el dilucidau igl operar d’ in vengonz spiritual. Savent ch’ il dretg predicatur cali si aunc entochen che ses attenzius auditurs tadlassen aunc bugien empau el, ha siu bi, edificont priedi cuzzau mo ina buna mesura. La s. messa ei solemnamein ida bein vinavon ed il versau organist claustral ha compignau il cant cun ses bials preludis. In solemn Te-deum ha finiu il survetsch divin, al qual il pievel ha devoziusamein assistiu.
Culla medema pompa ei il til festiv returnaus el liug festiv, nua ch’ il Sgr. primiziant ha egl hotel Lucmanier splendidamein gastau ses parents ed amitgs. Quei pastg ha fatg bonur alla premurada cuschaniera, mo steva buca dal tut en concordanza culs plaids de Mr. uestg, ch’ ha expressivamein giu recommondau a ses primiziants de tier las usitadas gasterias de lur messas nuvialas buca survargar memia fetg ils tiarms della simpladat e frugalitat. Telegramms e brevs de gratulaziuns al Sgr. primiziant naven da Mustair entochen Paris han buca muncau, mo la cruna de quellas gratulaziuns ei stau la biala ed edificonta brev della muniessa Sigisberta a Mustair, sora dil Sgr. primiziant e de siu frar Sur Augustin. Gratulont ella als cars gieniturs de haver dus figls spirituals ed ina figlia en claustra terlischavan larmas en bia égls ed en lur legria giud quei venerabel treifegl spiritual vessen bab a mumma podiu clomar si cul vegl Simeon el tempel: „ussa, o Segner, lai murir nus en pasch!“
Plaids, toasts ed era cant ha ei silsuenter buca muncau e bein enqual humoristica remarca ha provocau gienerala bilaritat. Perfin ils intressants tunnels dil stradun dil Lucmagn, ils gartiai ed era il falliu, han cheu allegoricamein stoviu far lur survetsch. Finida la gasteria ein las solemnas viaspras vegnidas celebradas ella stretga baselgia de Curaglia, e silsuenter han ils jasters priu la via sut ils peis per a dretg temps untgir ora ad in smanatschont urezi. Tuts ils presents ein stai edificai e cuntentai giud quei bi di dil Segner. Possi quei purtar ventira e benedicziun!