Ein Praemonstratenser Ordens Abbtey / beym vordern Rhein / da herumb Welsche Lepontii wohnen / zwischen Tavetsch / vnd Ilantz / vnter dem Luckmannier Berg / vnd im Thal Medels / gelegen / so etwan ein Stand deß Reichs gewesen ist; aber anjetzo von den Graubüntern eximirt wird. Was den Vrsprung jetztgedachten Rheinstrombs anbelangt / so setzet Josias Simlerus, in Commentario de Alpibus, desselben drey Bronnen / als deß Mitlern im Gebürg / Cadelin / deß vordern vff dem Crispalt / vnnd deß hindern auff dem Berg Colmo de Occello genannt / so alle drey nahend beysammen / vnnd / von den Alten / mit einem Nahmen / der Berg Adulagenannt worden. Andere sagen / daß der andere theil deß Rhaetischen Alpgebürgs sich ziehe / von dem Setmer / gegen Niedergang / [84] von den Rhaetis, biß zu den Lepontiern / an die höchsten Alpes, die man den Gotthart heisse: Vnd dieser Strich werde in gemein / von den Alten / Alpes Adulae genant / darin der Rhein an zweyen Enden / zwischen den Alpen Julien / vnnd dem Gotthart / entspringe. Vnd diese Alpes Adulae hätten auch mancherley Nahmen / in deme Sie der Vrscheler / der Vogel / vnd der Luckmanier / geheissen würden. Vnnd werde der Vogel / da der hinder Rhein entspringt / Culmen de Occello, oder Colmen de Sant Bernardino,vnd der Luckmanier Lucumonis mons genant / auff welchen / gegen Niedergang / der Gotthart folge: Die Landleuth beym Vrsprung beyder Rhein / vmb den Vogel / vnd Luckmanier / seyen rechte Lepontier / diß Orts den Graubüntern vnterthan. Vnd dieses sagen Sie. Leonhart Thurneiser meldet / der Rhein habe vier fürnehme Quellen / namblich der hinder zwey / vnd der vorder auch zwey. Deß hindern Rheins zwey Quellen kommen bey dem Flecken Reinwald zusammen / vnd lauffen auff Thusis zu; zwischen welchem Ort / vnnd der Statt Chur / beyde / der vorder / vnnd hinder Rhein / zusammen kommen / vnnd mit einander ihren lauff nach Rheineck / vnd in den Bodensee; auß demselben aber auff Basel zu / vnd dann ferners nach dem Niederland / vnd ins Meer nehmen.