annada 60, nr. 51 dils 21 da december 1916

Il mardis vargau ei a Mustér vegniu surdau alla fossa in vischin de cheu, che mereta er’ ella Gas. Rom. entgins plaids de buna memoria. Sgr. pictur Antoni Columberg, ne, sco el ei da giuven ensi vegnius numnaus en siu liug nativ sco ell’ entira vallada, il „Toni moler“, ei la domengia notg anetgamein spartius da quest mund, aschilunsch nunspetgadamein, ch’ el mava schiglioc aunc adina entuorn e suenter sias fatschentas, malgrad che la fleivlezia de vegliadetgna haveva, dapi ina greva malsogna d’ avon in onn, surpriu veseivlamein igl um de passa 74 onns. Aunc il di avon havev’ el fatg, bein a pusinond, sia viseta el vitg; igl ei stau la davosa en veta.

Sche Toni Columberg ei cun 74 onns staus isaus e surprius da fleivlezia, sch’ ei quei buca de sesmervegliar tier in um, ch’ ei ina liunga vet’ ora staus in exempel de luvrusadat e quei plitost cun sesurvir de sia energia e de siu tschaffen tier la lavur, che de sias pli fleivlas forzas corporalas. Mo per gronda part levgiau siu grev buordi ha tras si’ entira veta era siu adina bien humor. Sco sia luvrusadat, recliadat e solidadat havevan fatg el generalmein stimaus, aschia fageva siu humor e siu bien caracter era adina beinvesius el en societat. — Toni Columberg haveva da giuven era frequentau entgins onns la scola claustrala e passond cun ca. 17 onns ord quella, ha el per munconza de scolasts stoviu dar scola quei unviern ad Accletta. Toni fuv’ aunc en ses vegls dis loschs de haver giu funczionau inaga sco scolast e quei mo per ina paga de 60 fr. i

Mussond gia en scola bien talent el desegn, ha el lu elegiu la clamada de pictur, ei daventaus in bien meister cul pensel e ha cun agid de ses 3 fegls de medema clamada mess neu ina considerabla fatschenta cun lavur dall’ entira vallada sidengiu. Sch’ el schev’ enqualga cun humor, ch’ el hagi en ses giuvens onns stoviu bardigliar 24 gadas casa, sche havev’ el ussa la satisfacziun de tras sia activitat haver rabitschau tier in brav agen casamen. Tier tut sia atgna gronda lavur fuva Toni dasperas adina in um fetg survetscheivel; cunzun nua ch’ ei setractava de contribuir cun lavur tier occasiuns publicas disdev’ el mai e fuv’ adin’ in dils capo iniziants e promoturs d’ organisaziuns festivas d’ ina ne l’ autra specia. El demussava per il public buca mo viv interess cun plaids, mobein era cun ovras e ha per tals intents sacrificau bia temps e lavur. Cun Toni Columberg ei puspei in toc dil bien vegl Vitg Mustér svanius ed jus vi ella perpetnadat, in bien bab de familia, in activ e real mistergner, in bien e brav burgheis. El ruaussi en paisch!