annada 60, nr. 15 dils 13 d’avrel 1916

L’ uniun de trafic sursilvana ha teniu domengia vargada a Mustér sia redunonza generala. La sessiun ei vegnida presidiada dagl activ e speditiv President, Sgr. for. cirq. Jos. Huonder. Ord il rapport annual, il qual ei vegnius surdaus en squetsch als commembers, semuossa evidentamein che la suprastonza ei buca stada lischenta duront il stermentus temps d’ uiara, che smanatscha de serar si e strunglar vi era en nossa vall commers e trafic pli e pli. Ils hoteliers sursilvans han giu concludiu a Glion en numerusa frequenza, malgrad lur miserias, d’ alzar lur contribuziun annuala alla cassa dell‘ uniun da 50 cts. per létg ded jasters sin 1 fr., renconuschend eis l’impurtonza dell’ uniun per lur industria. Igl exempel dils hoteliers e lur sacrificonta buna veglia ha lura giu fretgeivla infiluenza era sin auters beinvulents umens sursilvans ed il diember dils commembers ei carschius da 52 sin 137, mo ei fuss giavischeivel e basegns, che aunc biars fetg biars renconuschessen la necessitat de setener ensemen e de segidar per puder resister als schliats temps e per puder reussir els onns pli favoreivels.

Ina dellas principalas tractandas ei stau la discussiun sur della circulara relaschada dalla regenza davart la moziun d’ automobils. La redunonza ha cun gronda majoritat concludiu la resoluziun en favur d’ ina limitada admissiun dils automobils el cantun Grischun. Il conclus ei vegnius prius encunter ina proposiziun fatga: de vuler desister d’ ina formala resoluziun, essend che quella vegnessi a contrastar memia fetg cun las resoluziuns per part gia pridas ed era cun quellas, che vegnan aunc a suondar, probabel, dallas vischnauncas politicas en Surselva. Ins ha cheu encunter fatg valer la raschun, ch’ ils basegns de commers e trafic ed en special l’ industria ded jasters giustificheschi ina positiva resoluziun da part dell’ uniun de trafic, ton pli che las relaziuns en nossa Surselva seigien dapi l’enconuschenta votaziun de 1911 essenzialmein semidadas.

Davart la repartiziun de reconvalescents d’ uiara per nies cantun ei dapresent d’ endriescher nuot positiv. La redunonza ha aunc concludiu de separticipar per il considereivel importo vid la reclama collectiva dell’ uniun de trafic cantonala e de ultra de quei spender ina pl gronda summa per la reclama indigena. Per conclusiun de nies quort rapport engraziein nus era ella „Gasetta“ a tuts ils amitgs ed amitgas della biala Surselva egl jester che sedattan onn per onn bia breigia de far er conuschenta la vall dil giuven Rhein tras plaid e scartia. Als compatriots clom’ jeu tier:

Sursilvans segidei
Sche gida Dieus adina,
La curascha salvei
E seiges tuts perina.