annada 60, nr. 1 dils 5 da schaner 1916

Historia indigena. Rev. P. Notker Curti, conventual della ven. claustra de Mustér, premurau e versau scrutatur dil temps vegl e de sia historia culturala e religiusa, ha daquort puspei publicau duas interessantas lavurs ord quei terren.

El vol. LXX. della scartira periodica „Geschichtsfreund“ ha el schau comparer in „Rapport de visitaziun sur la Vall Ursera digl onn 1643“, che sesanfla sper auters medems rapports ord quei temps egl arhiv episcopal a Cuera. Il rapport ei en lungatg latin e dariva dal prenci-uestg Johann VI Flugi d’ Aspermont (1636—1661), che ha giu concepiu quei 1643 sur ina visitaziun en Surselva ed ella Vall Ursera; las explicaziuns digl editur ein per tudestg. Il rapport contegn rehs detagls sur las singulas baselgias e capluttas, lur facultat ed indrez, sur plevons e schizun sur ils calusters de glez temps. Ursera, Hospenthal e Realp formavan lu mo ina soletta pleiv.

La secunda publicaziun de P. Notker Curti sesanfla en Nr. 12 della scartira „Bündner Monatsblatt“ 1915 e tractescha las capluttas veglias en Surselva, medemamein tenor igl allegau Rapport de visitaziun de 1643. Ei setractescha dellas capluttas, per part ussa baselgias parochialas, de: S. Sein a Ladir, S. Flurin a Siat e S. Valentin a Pigniu; de S. Sievi a Breil, S. Placi a Mustér e S. Benedetg a Sumvitg. — Quellas publicaziuns porschan bia interess per amitgs dell’ antiquitat.